న్యూస్ డెస్క్: ఆసియా కప్ ఫైనల్ ముగిసి రెండు రోజులు అవుతున్నా.. టీమిండియా విజేతగా నిలిచినా ట్రోఫీ మాత్రం చేతికి రాలేదు. ఫైనల్ అనంతరం పాకిస్థాన్ మంత్రి, ఏసీసీ అధ్యక్షుడు మొహిసిన్ నఖ్వీ చేతుల మీదుగా ట్రోఫీని తీసుకోవడాన్ని భారత జట్టు నిరాకరించింది. దీంతో నఖ్వీ ట్రోఫీ, విజేతల మెడల్స్‌ను ఎత్తుకెళ్లాడని వార్తలు వస్తున్నాయి.
గ్రౌండ్‌లో ముగిసిన వేడుక తరువాత బయట మాత్రం కొత్త డ్రామా మొదలైంది. నఖ్వీ తన హోటల్ రూమ్‌కి ట్రోఫీని తీసుకెళ్లాడని సమాచారం. దీంతో బీసీసీఐ ఆగ్రహం వ్యక్తం చేస్తూ, ట్రోఫీని తక్షణమే ఏసీసీ కార్యాలయానికి పంపాలని కోరింది.
దుబాయ్‌లో మంగళవారం జరగనున్న ఏసీసీ మీటింగ్‌లో ఈ అంశం ప్రధానంగా చర్చకు రావడం ఖాయం. అంతర్జాతీయ స్థాయిలో కూడా ఈ వివాదం లేవనెత్తబడే అవకాశం ఉంది.
ఇక నఖ్వీ పాకిస్థాన్‌కు ట్రోఫీని తీసుకెళ్లాడా? అనే అనుమానాలు గట్టిగా వినిపిస్తున్నాయి. అయితే అలాంటి పని చేస్తే పాక్ క్రికెట్ బోర్డుకే పెద్ద ఇబ్బందులు తప్పవని నిపుణులు చెబుతున్నారు.
భారత జట్టు నిరాకరించడమే కాకుండా, నఖ్వీ కడుపు మండిపోవడం ఈ పరిస్థితికి కారణమైందని భావిస్తున్నారు. బీసీసీఐ మాత్రం ఈ వ్యవహారాన్ని సీరియస్‌గా తీసుకుని చర్యలు తీసుకోవడానికి సిద్ధంగా ఉంది.
మొత్తానికి ఆసియా కప్ ట్రోఫీ ఇప్పుడు క్రికెట్ కంటే ఎక్కువగా రాజకీయ, రాజనీతిక రంగాల్లో చర్చనీయాంశంగా మారింది.