పాన్ ఇండియా మల్టీస్టారర్ ‘వార్ 2’ ఆగస్టు 14న గ్రాండ్ రిలీజ్‌కి సిద్ధమవుతోంది. ఈ సందర్భంగా హైదరాబాద్‌లో జరిగిన ప్రీ రిలీజ్ ఈవెంట్‌లో ఎన్టీఆర్ తన అభిమానులను ఉద్దేశించి హృదయాన్ని తాకే వ్యాఖ్యలు చేశారు.
ఎన్టీఆర్ మాట్లాడుతూ, తన 25 ఏళ్ల సినీ ప్రయాణంలో అభిమానుల నుంచి పొందిన ప్రేమ ఈ జన్మకు చాలనిపిస్తోందని తెలిపారు. నందమూరి హరికృష్ణ తనయుడిగా పుట్టినా, జీవితం మొత్తం అభిమానులకే అంకితం అవుతుందని చెప్పారు. తన అడుగులు ఎప్పుడూ అభిమానుల ఆనందం కోసం పడతాయని స్పష్టం చేశారు.
అభిమానులు చేసిన ప్రార్థనలకు ఎన్ని జన్మలైనా రుణం తీర్చుకోలేనని భావోద్వేగంతో చెప్పారు. ఈ వేడుకను ఏర్పాటు చేసిన నిర్మాత నాగవంశీకి కృతజ్ఞతలు తెలిపారు.
‘వార్ 2’ చేయడానికి ప్రధాన కారణం నిర్మాత ఆదిత్య చోప్రా అని ఎన్టీఆర్ వెల్లడించారు. అభిమానులు గర్వపడేలా ఈ చిత్రాన్ని రూపొందించారని చెప్పారు.
హృతిక్ రోషన్ గురించి మాట్లాడుతూ, ‘కహోనా ప్యార్ హై’ లో ఆయన డ్యాన్స్ చూసి స్ఫూర్తి పొందానని, ఇప్పుడు ఆయన పక్కన నటించడం తన అదృష్టమని పేర్కొన్నారు. ఆయనతో కలిసి డ్యాన్స్ చేయడం మరపురాని అనుభవమని అన్నారు.
ఈ భావోద్వేగ వ్యాఖ్యలు అక్కడ ఉన్న అభిమానుల్లో ఉత్సాహం నింపాయి. ‘వార్ 2’లో ఎన్టీఆర్, హృతిక్ కలయిక తెరపై ఎలా మెరిసిపోతుందో చూడటానికి అందరూ ఆసక్తిగా ఎదురుచూస్తున్నారు.