కొవ్వూరు నియోజకవర్గ జనసేన ఇన్‌ఛార్జి టి.వి. రామారావుపై పార్టీ క్రమశిక్షణ చర్యలు తీసుకుంది. ఆయనను పార్టీ బాధ్యతల నుంచి తప్పించినట్టు అధికారికంగా ప్రకటించింది.
రాష్ట్రంలో సహకార సంఘాల నియామకాల్లో జరిగిన అన్యాయంపై టి.వి. రామారావు ఆధ్వర్యంలో జనసేన కార్యకర్తలు రాస్తారోకో చేశారు. దీనిపై పార్టీ అధిష్టానాన్ని ముందుగా సమాచారం ఇవ్వకపోవడం దుష్పరిణామాలకు దారి తీసింది.
జనసేన కూటమి ధోరణికి వ్యతిరేకంగా తన స్థాయిలో ఆందోళనలు చేయడాన్ని అధిష్టానం తీవ్రంగా పరిగణించింది. దీంతో ఆయనను నియోజకవర్గ ఇన్‌ఛార్జి పదవి నుంచి తప్పించినట్లు కాన్ఫ్లిక్ట్ మేనేజ్‌మెంట్ హెడ్ అజయ్ కుమార్ ప్రకటించారు.
పార్టీ నిర్ణయాలకి విరుద్ధంగా మాట్లాడడం, కార్యక్రమాలు చేపట్టడం కూటమి పరంగా సమస్యలు తలెత్తించే అవకాశముందని స్పష్టం చేశారు. తుది నిర్ణయం వచ్చేంతవరకూ రామారావు పార్టీ కార్యకలాపాలకు దూరంగా ఉండాలని సూచించారు.
రామారావు గతంలో తెదేపాలో ఉన్నారు. అనంతరం వైకాపా నుంచి జనసేనలో చేరారు. తాజాగా ఆయన ఆందోళన చర్యలు వివాదాస్పదంగా మారడంతో చర్యలు తీసుకున్నారు.