నేడు పాన్ ఇండియా రెబల్ స్టార్ ప్రభాస్ తన పుట్టినరోజు జరుపుకుంటున్నారు. ఆయన బర్త్డే అనేది కేవలం ఒక సినిమా వేడుక కాదు, ఇది దేశవ్యాప్త అభిమానులకు, యావత్ భారతీయ పరిశ్రమకు ఒక ఉత్సవం. సోషల్ మీడియాలో కొన్ని రోజుల ముందు నుంచే మొదలైన ఈ హంగామా, ఆయనకున్న పాన్-వరల్డ్ క్రేజ్కు నిదర్శనంగా నిలుస్తోంది. తెలుగు రాష్ట్రాల నుంచి అమెరికా, జపాన్ వరకు ఆయన అభిమానులు ఈ రోజును ఘనంగా సెలబ్రేట్ చేసుకుంటున్నారు.
ఒకప్పుడు టాలీవుడ్ స్టార్గా ఉన్న ప్రభాస్, ‘బాహుబలి‘ చిత్రంతో భారతీయ సినిమా సరిహద్దులను చెరిపేశారు. ఆ ఒక్క చిత్రంతో ఆయన రేంజ్ మారిపోయింది, ఆయన చేసే ప్రతీ సినిమా సహజంగానే ఒక గ్లోబల్ ప్రాజెక్ట్గా మారుతోంది. పదేళ్ల తర్వాత ‘బాహుబలి: ది ఎపిక్’గా రీ-రిలీజ్ అవుతున్న సినిమాపై ఉన్న అంచనాలే ఆయన స్టామినాకు తాజా ఉదాహరణ. ఆయన సినిమా వస్తుందంటే చాలు, భాషతో సంబంధం లేకుండా ప్రపంచవ్యాప్తంగా భారీ ఓపెనింగ్స్ రాబట్టడం ఖాయం.
ప్రస్తుతం ఆయన లైనప్ చూస్తే, తన ఇమేజ్ను ఎంత చాకచక్యంగా బ్యాలెన్స్ చేస్తున్నాడో అర్థమవుతుంది. ఒకవైపు ‘సలార్ 2’, ‘కల్కి 2’, ‘స్పిరిట్’, హను రాఘవపూడితో స్పై థ్రిల్లర్ వంటి భారీ యాక్షన్ చిత్రాలతో తన పాన్ ఇండియా ఇమేజ్ను పటిష్టం చేసుకుంటున్నారు. అదే సమయంలో, మారుతి దర్శకత్వంలో ‘ది రాజా సాబ్’ వంటి రొమాంటిక్ హారర్ కామెడీతో ప్రేక్షకుల ముందుకు రానుండటం విశేషం.
‘ది రాజా సాబ్’ ప్రాజెక్ట్పై అంచనాలు భారీగా ఉండటానికి ఓ ప్రత్యేక కారణం ఉంది. చాలా కాలంగా అభిమానులు మిస్ అవుతున్న ఆ వింటేజ్ లవర్ బాయ్ ప్రభాస్ను, ఆయన చార్మింగ్ను ఈ సినిమాలో మళ్లీ చూడబోతున్నాం. ఈ ఒక్క అంశమే సినిమాపై విపరీతమైన హైప్ క్రియేట్ చేసింది. ఇది ఆయన అన్ని రకాల పాత్రలకు సరిపోతాడని నిరూపిస్తుంది.
ప్రభాస్ను కేవలం బాక్సాఫీస్ నంబర్లతో మాత్రమే కొలవలేం. తెరపై ఆయన ఎంత పెద్ద స్టార్ అయినా, నిజ జీవితంలో ఆయన సింప్లిసిటీ, స్నేహానికి ఇచ్చే విలువ, సహాయం చేసే గుణం ఆయన్ని ఇండస్ట్రీలో ప్రత్యేకంగా నిలబెట్టాయి. బహుశా, భారతీయ చిత్ర పరిశ్రమలో “శత్రువులు లేని ఏకైక పాన్ ఇండియా స్టార్” ప్రభాస్ మాత్రమే. ఆయనను నచ్చని వారు ఉండరంటే అతిశయోక్తి కాదు.
అందరినీ “డార్లింగ్” అని ఆప్యాయంగా పలకరించే ఆయన వ్యక్తిత్వమే అభిమానులకు ఆయనను మరింత దగ్గర చేసింది. ఈ అరుదైన స్టార్డమ్, గొప్ప వ్యక్తిత్వం కలయికే ప్రభాస్ను అందరివాడిగా మార్చింది. తెలుగు సినిమా ఖ్యాతిని గ్లోబల్ మ్యాప్లో నిలబెడుతున్న డార్లింగ్, ఇలాంటి పుట్టినరోజులు మరెన్నో జరుపుకోవాలని, మరిన్ని ఘన విజయాలు సాధించాలని మనస్ఫూర్తిగా కోరుకుందాం.