పులివెందుల: జడ్పీటీసీ ఉప ఎన్నిక ప్రస్తుతం ఆంధ్రప్రదేశ్ రాజకీయాల్లో హాట్ టాపిక్ అయింది. అధికార కూటమి పార్టీలతో పాటు వైసీపీ కూడా ఈ ఎన్నికను ప్రతిష్ఠాత్మకంగా తీసుకుంది. టీడీపీ తరఫున బీటెక్ రవి భార్య మారెడ్డి లతారెడ్డి, వైసీపీ తరఫున తుమ్మల హేమంత్ రెడ్డి పోటీ చేస్తున్నారు.
ఇరు పార్టీల కీలక నేతలు అక్కడే మకాం వేసి, ఓటర్లను ఆకట్టుకునేలా ప్రచారం చేస్తున్నారు. ఈ నేపథ్యంలో ముఖ్యమంత్రి చంద్రబాబు కీలక వ్యాఖ్యలు చేశారు.
కూటమి నేతలందరూ కలిసికట్టుగా పనిచేస్తే తప్పకుండా విజయం సాధించవచ్చని చెప్పారు. తాను ప్రత్యేకంగా పులివెందుల అభివృద్ధికి కృషి చేస్తానని హామీ ఇచ్చారు.
పులివెందుల ఉప ఎన్నిక కోసం కూటమి పార్టీలకు చెందిన 40 మంది నేతలతో చంద్రబాబు టెలికాన్ఫరెన్స్ నిర్వహించారు. ఈ సమావేశంలో పలు వ్యూహాలపై చర్చ జరిగింది. పులివెందుల టీడీపీ ఇన్చార్జ్ బీటెక్ రవి, బీజేపీ ఎమ్మెల్యే ఆదినారాయణరెడ్డి, ఎమ్మెల్సీ రామగోపాల్ రెడ్డి తదితరులు పాల్గొన్నారు.
గత టీడీపీ ప్రభుత్వ హయాంలోనే కృష్ణా నదీ జలాలను పులివెందులకు తీసుకువచ్చామని చంద్రబాబు గుర్తుచేశారు. రైతుల సంక్షేమానికి దృష్టిపెట్టామని వివరించారు.
చివరగా, ఇప్పుడు కూడా కూటమి ప్రభుత్వం పలు సంక్షేమ పథకాలను ప్రజల్లోకి తీసుకెళ్లి, అభివృద్ధికి కట్టుబడి ఉన్నామని తెలిపారు.