న్యూస్ డెస్క్: ఆంధ్రప్రదేశ్లోని మహిళలకు ముఖ్యమంత్రి చంద్రబాబు నాయుడు శుభవార్త చెప్పారు. ఈ నెల 15వ తేదీ నుండి రాష్ట్రంలోని మహిళలకు ఆర్టీసీ బస్సుల్లో ఉచితంగా ప్రయాణించే అవకాశాన్ని కల్పిస్తూ ప్రభుత్వం నిర్ణయం తీసుకుంది.
ఇది మహిళల ప్రయాణ ఖర్చులను తగ్గించడంలో సహాయపడే దిశగా ఎంతో ఉపయోగకరమైంది. ఈ పథకం ప్రారంభ వేడుకకు మంత్రులందరూ హాజరుకావాలని సీఎం ఆదేశించారు. అలాగే బస్సు సదుపాయం కల్పించకముందే ఆటో డ్రైవర్లతో చర్చించాలన్న మంత్రి నాదెండ్ల మనోహర్ సూచనను చంద్రబాబు అంగీకరించారు.
దీనిపై సంబంధిత అధికారులను చర్యలు తీసుకోవాలని సూచించారు. మహిళల భద్రత, ప్రయాణ సౌలభ్యం దృష్ట్యా ఇది సరికొత్త అడుగు కావడం విశేషం.
కేబినెట్ భేటీ అనంతరం సీఎం చంద్రబాబు రాజకీయ పరిణామాలపై కూడా స్పందించారు. వైసీపీ హయాంలో సింగపూర్ ప్రభుత్వంపై భయాందోళనలు కలిగిపోయాయని, పెట్టుబడులపై భరోసా కోల్పోయినట్టు అన్నారు. ఇప్పుడు ఆ నమ్మకాన్ని తిరిగి పొందేందుకు ఎన్నో ప్రయత్నాలు చేయాల్సి వస్తోందని పేర్కొన్నారు.
సింగపూర్ ప్రభుత్వాన్ని పెట్టుబడుల సదస్సుకు ఆహ్వానించడంలో కూడా ఇబ్బందులు ఎదురయ్యాయని సీఎం తెలిపారు. గత ప్రభుత్వం వ్యవహరించిన తీరు వల్లే సింగపూర్ మంత్రులు అంగీకరించడానికి సిద్ధపడలేదని మండిపడ్డారు. ఈ విషయాన్ని బాధగా గుర్తు చేశారు.
ఇక నూతన బార్ పాలసీకి మంత్రివర్గం ఆమోదం తెలిపిన నేపథ్యంలో, కల్లు కార్మికుల హక్కులను కాపాడేందుకు చర్యలు తీసుకుంటామని సీఎం తెలిపారు. బినామీ వ్యవహారాలు వెలుగుచూస్తే ఖచ్చితంగా కఠినంగా వ్యవహరిస్తామని హెచ్చరించారు.