న్యూస్ డెస్క్: భారత్-చైనా సరిహద్దు ఉద్రిక్తతలను తగ్గించేందుకు భారత రక్షణ మంత్రి రాజ్‌నాథ్ సింగ్ కీలక ప్రకటన చేశారు. చైనా కింగ్‌డావోలో జరిగిన ఎస్సీవో సమావేశం సందర్భంగా ఆయన చైనా రక్షణ మంత్రి అడ్మిరల్ డాంగ్ జున్‌తో ప్రత్యేకంగా సమావేశమయ్యారు.
ఈ సందర్భంగా రాజ్‌నాథ్ నాలుగు అంశాలపై ఆధారపడిన శాంతి ఫార్ములాను ప్రతిపాదించారు. మొదటిగా, 2024 బలగాల ఉపసంహరణ ఒప్పందానికి రెండు దేశాలు కట్టుబడి ఉండాలని సూచించారు. రెండవది, సరిహద్దుల్లో ఉద్రిక్తతలను పూర్తిగా తగ్గించేందుకు నిరంతర చర్చలు జరపాలని పేర్కొన్నారు.
మూడవ అంశంగా, సరిహద్దుల మార్కింగ్, డీలిమిటేషన్ ప్రక్రియను వేగవంతం చేయాలని చెప్పారు. చివరిగా, ప్రత్యేక ప్రతినిధుల యంత్రాంగం ద్వారా ద్వైపాక్షిక విభేదాలను పరిష్కరించేందుకు నూతన చర్చల ప్రణాళిక రూపొందించాలని తెలిపారు.
కేవలం సరిహద్దు సమస్యలే కాదు, పాకిస్థాన్ ప్రేరేపిత ఉగ్రవాదంపై కూడా రాజ్‌నాథ్ వ్యాఖ్యలు చేశారు. భారత్ ఉగ్రవాదాన్ని సహించదని, ఆపరేషన్ సిందూర్‌ ద్వారా దీటైన చర్యలు కొనసాగుతాయని చైనాకు స్పష్టంచేశారు.
ఈ దౌత్య భేటీ ద్వారా భారత్ వ్యూహాత్మక అంశాలపై కూడా తన మట్టికట్టిన వైఖరిని చైనా ముందుంచింది. ఇరు దేశాల మధ్య శాంతియుత సంబంధాలకు ఇది తొలి కీలక అడుగుగా భావిస్తున్నారు.