న్యూస్ డెస్క్: టి20ల్లో 300 పరుగులు చేయడం అంటే ఒక అసాధ్యమని అనుకునే వారు చాలామంది. కానీ ఇంగ్లండ్ ఆ రికార్డు సాధించి చరిత్ర సృష్టించింది. దక్షిణాఫ్రికాతో జరిగిన మ్యాచ్‌లో బజ్ బాల్ ధాటితో బ్యాట్స్‌మెన్ దుమ్మురేపారు. ఒక టెస్టు దేశం ఇంత భారీ స్కోరు చేయడం ఇదే మొదటిసారి.
ఫిల్ సాల్ట్, జాస్ బట్లర్ ఓపెనింగ్ నుంచే దక్షిణాఫ్రికా బౌలర్లను చిత్తు చేశారు. సాల్ట్ 60 బంతుల్లో 141 పరుగులు, బట్లర్ 30 బంతుల్లో 83 పరుగులు బాదారు. వీరి ఇన్నింగ్స్ తో ఇంగ్లండ్ 20 ఓవర్లలో కేవలం రెండు వికెట్లు కోల్పోయి 304 పరుగులు చేసింది.
సాల్ట్ సెంచరీ కేవలం 39 బంతుల్లోనే రావడం రికార్డు స్థాయిలో నిలిచింది. 15 ఫోర్లు, 8 సిక్సులతో అతడు దక్షిణాఫ్రికా బౌలింగ్‌ను చిత్తు చేశాడు. బట్లర్ 7 సిక్సులు, 8 ఫోర్లతో జోరుగా ఆడాడు.
ఆల్‌రౌండర్ బెతెల్ (26), కెప్టెన్ బ్రూక్ (41) కూడా అద్భుతంగా ఆడారు. మొత్తం ఇన్నింగ్స్‌లో ఇంగ్లండ్ బలమైన అటాక్ చూపింది.
దీనికి ప్రతిగా దక్షిణాఫ్రికా బ్యాటింగ్ కుప్పకూలింది. మొత్తం జట్టు కేవలం 158 పరుగులకే ఆలౌట్ అయ్యింది. ఫలితంగా ఇంగ్లండ్ 146 పరుగుల తేడాతో ఘన విజయం సాధించింది.
ఇది అంతర్జాతీయ టి20లో ఇప్పటి వరకు నమోదైన అతిపెద్ద మార్జిన్ విజయంగా రికార్డైంది. ఇంగ్లండ్ బజ్ బాల్ పద్ధతి మరోసారి ఫలితాన్ని ఇచ్చిందని అభిమానులు అంటున్నారు.