న్యూస్ డెస్క్: కడప జిల్లా పులివెందుల జడ్పీటీసీ ఉపఎన్నికలో వైఎస్సార్సీపీ తీరుపై టీడీపీ నేత బీటెక్ రవి తీవ్ర విమర్శలు గుప్పించారు. ఎన్నికల సంఘం ఆదేశించిన రెండు బూత్‌ల రీపోలింగ్‌ను వైఎస్సార్సీపీ బహిష్కరించడాన్ని ఆయన “ఓటమి భయానికి నిదర్శనం”గా పేర్కొన్నారు.
రవి మాట్లాడుతూ, మొదట 15 బూత్‌లలో రీపోలింగ్ డిమాండ్ చేసిన పార్టీ, ఇప్పుడు రెండు బూత్‌లలో రీపోలింగ్‌కు వెనుకంజ వేయడం విడ్డూరమని అన్నారు. ప్రజాస్వామ్యంపై నమ్మకం ఉంటే ఈ రీపోలింగ్‌ను ఎందుకు అంగీకరించడం లేదని ప్రశ్నించారు.
ప్రజలు తమకు ఓటు వేయరని ముందే గ్రహించడంతోనే ఈ బహిష్కరణ నాటకం ఆడుతున్నారని రవి ఆరోపించారు. ఎన్నికలు జరిగితే మళ్లీ రీపోలింగ్ జరగదని తెలిసినా పోటీ నుంచి తప్పుకోవడం భయాన్ని చాటుతుందని అన్నారు.
ఇతర టీడీపీ నేతలు కూడా ఈ నిర్ణయాన్ని “డైవర్షన్ పాలిటిక్స్”గా అభివర్ణించారు. పోలింగ్ రోజు ఓట్ల లెక్క అర్థం చేసుకున్న తర్వాత కావాలనే రీపోలింగ్ వివాదం తెచ్చారని విమర్శించారు.
“గతంలో రాజారెడ్డి రాజ్యాంగం నడిచింది. ఇప్పుడు ప్రజలు అంబేద్కర్ రాజ్యాంగం కోరుకుంటున్నారు” అంటూ ఎన్డీయే అభ్యర్థికి ఓటు వేయాలని టీడీపీ పిలుపునిచ్చింది.