ప్రభాస్ పుట్టినరోజు కానుకగా ‘స్పిరిట్‘ టీమ్ విడుదల చేసిన “సౌండ్ స్టోరీ” ఆడియో గ్లింప్స్ సోషల్ మీడియాను ఊపేస్తోంది. జైలు సూపరింటెండెంట్ (ప్రకాష్ రాజ్), ఐపీఎస్ అధికారి (ప్రభాస్) మధ్య సాగే సంభాషణతో కూడిన ఈ వినూత్న గ్లింప్స్, సినిమాపై అంచనాలను తారాస్థాయికి చేర్చింది. దర్శకుడు సందీప్ రెడ్డి వంగా మార్క్ ఇంటెన్సిటీకి, ప్రభాస్ పవర్ఫుల్ వాయిస్కు ఫ్యాన్స్ ఫిదా అయిపోయారు.
అయితే, ఈ సౌండ్ స్టోరీ వెనుక ఓ షాకింగ్ టెక్నాలజీ ప్రయోగం జరిగిందనే వార్త ఇప్పుడు నెట్టింట చక్కర్లు కొడుతోంది. ఈ ఆడియో గ్లింప్స్ను ఆర్టిఫిషియల్ ఇంటెలిజెన్స్ (AI) వాయిస్ జనరేషన్ టెక్నాలజీ ద్వారా సృష్టించారని జోరుగా ప్రచారం జరుగుతోంది. పప్పు అనే ఇంజనీర్ అభివృద్ధి చేసిన ఓ ప్రత్యేక డబ్బింగ్ సాఫ్ట్వేర్ను ఇందుకోసం ఉపయోగించినట్లు తెలుస్తోంది.
ఈ ప్రచారం ప్రకారం, ప్రభాస్, ప్రకాష్ రాజ్లు స్టూడియోకి వెళ్లి తమ వాయిస్లను రికార్డ్ చేయలేదని, వారి గొంతులను AI ద్వారా కృత్రిమంగా సృష్టించి ఈ గ్లింప్స్ను తయారు చేశారని అంటున్నారు. ఈ విషయాన్ని దర్శకుడు సందీప్ ముందే ప్రభాస్కు తెలియజేసినట్లు కూడా వినికిడి.
నిజానికి, ప్రభాస్ పుట్టినరోజు నాటికి ఏదో ఒక అప్డేట్ ఇవ్వాలనే ఉద్దేశంతో, సమయాభావం కారణంగా నటీనటులను పిలిపించి రికార్డ్ చేసే బదులు, సందీప్ ఈ AI టెక్నాలజీని వాడి ఉండొచ్చని ఊహాగానాలు వినిపిస్తున్నాయి. గతంలో కొన్ని చిత్రాలకు ఈ సాఫ్ట్వేర్ను వాడినట్లు కూడా సమాచారం.
ఈ వార్త తెలిసి నెటిజన్లు, సినీ ప్రియులు ఆశ్చర్యం వ్యక్తం చేస్తున్నారు. “ఏంటి నిజమా? AI తోనే చేశారా?” అంటూ కామెంట్లతో హోరెత్తిస్తున్నారు. ఒకవేళ ఇది నిజమైతే, భారతీయ సినిమాలో ఇలాంటి టెక్నాలజీని ప్రమోషనల్ కంటెంట్ కోసం వాడటం ఇదే తొలిసారి కావచ్చు.
ప్రభాస్-సందీప్ కాంబోలో రానున్న ఈ భారీ యాక్షన్ పోలీస్ డ్రామాపై ఇప్పటికే అంచనాలు భారీగా ఉన్నాయి. ఇప్పుడు ఈ AI ప్రయోగం వార్త ఆ అంచనాలను మరింత పెంచడమే కాకుండా, సినిమా టెక్నికల్ స్టాండర్డ్స్పై కూడా ఆసక్తిని రేకెత్తిస్తోంది.