న్యూస్ డెస్క్: ఆదాయపు పన్ను రిటర్నుల గడువు పొడిగించారనే వార్తలు సోషల్ మీడియాలో వైరల్ అవుతున్నాయి. అయితే ఈ ప్రచారం పూర్తిగా తప్పు అని కేంద్ర ప్రభుత్వం స్పష్టం చేసింది. 2024-25 ఆర్థిక సంవత్సరానికి సంబంధించిన రిటర్నులు సెప్టెంబర్ 15లోపే దాఖలు చేయాలని స్పష్టమైన గడువు ఉంది.
ఆదాయపు పన్ను శాఖ తెలిపిన వివరాల ప్రకారం, ఇప్పటివరకు 6 కోట్లకు పైగా పన్ను చెల్లింపుదారులు రిటర్నులు దాఖలు చేశారు. వీటిలో 5.5 కోట్లకు పైగా ఇ-వెరిఫై పూర్తయ్యింది. మిగిలిన వారు తక్షణమే రిటర్నులు ఫైల్ చేయాలని అధికారులు సూచించారు.
కొంతమంది సెప్టెంబర్ 30 వరకు పొడిగించారనే తప్పుడు వార్తలను పంచుకుంటున్నారని పన్ను శాఖ హెచ్చరించింది. నిజమైన సమాచారం కోసం అధికారిక వెబ్‌సైట్‌, హెల్ప్‌డెస్క్ లేదా ఎక్స్ ఖాతాను మాత్రమే నమ్మాలని తెలిపింది.
అలాగే రూ.3 లక్షల కంటే ఎక్కువ వార్షిక ఆదాయం ఉన్నవారు తప్పనిసరిగా రిటర్నులు దాఖలు చేయాలని గుర్తు చేసింది. పాత, కొత్త పన్ను విధానాలను పరిశీలించి సరైన ఆప్షన్ ఎంచుకోవాలని సూచించింది.
తప్పుడు మినహాయింపులు లేదా ఫేక్ రీఫండ్లు క్లెయిమ్ చేస్తే, జరిమానాలు మరియు నోటీసులు తప్పవని హెచ్చరించింది. ఇన్వెస్టర్లు, పన్ను చెల్లింపుదారులు జాగ్రత్తగా ఉండాలని అధికారులు పిలుపునిచ్చారు.
మొత్తానికి, గడువు పొడిగింపు లేనందున సెప్టెంబర్ 15లోపే రిటర్నులు పూర్తి చేయడం అత్యవసరం అని పన్ను శాఖ స్పష్టం చేసింది.