న్యూస్ డెస్క్: అమెరికా అధ్యక్షుడు డొనాల్డ్ ట్రంప్ ఆరోగ్యం బాగోలేదన్న ప్రచారం దేశంలో చర్చనీయాంశమైంది. సాధారణంగా తరచూ మీడియా ముందుకు వచ్చే ట్రంప్, గత కొన్ని రోజులుగా పబ్లిక్ ఈవెంట్లకు దూరంగా ఉండటమే ఈ వార్తలకు ఊతమిచ్చింది. ఆగస్టు 30, 31 తేదీల్లో ఆయన ఎటువంటి బహిరంగ కార్యక్రమాల్లోనూ పాల్గొనకపోవడంతో అనుమానాలు పెరిగాయి.
ఇక, ఇటీవల ట్రంప్ చేతిపై గాయాలు కనిపించడంతో సోషల్ మీడియాలో అనేక సందేహాలు వ్యక్తమయ్యాయి. ఆయన అభిమానులు, రాజకీయ ప్రత్యర్థులు ఆరోగ్యంపై ప్రశ్నలు లేవనెత్తారు. అయితే వైట్ హౌస్ వర్గాలు దీనిని పెద్ద సమస్య కాదని పేర్కొన్నాయి. ట్రంప్ తన ఆలోచనలు, వ్యాఖ్యలను ‘ట్రూత్ సోషల్’లోనే పోస్ట్ చేస్తూ సంప్రదాయానికి భిన్నంగా వ్యవహరిస్తున్నారని తెలిపారు.
ఉపాధ్యక్షుడు జేడీ వాన్స్ ఈ ఊహాగానాలను కొట్టిపారేశారు. ట్రంప్ పూర్తిగా ఆరోగ్యంగానే ఉన్నారని, బహిరంగ కార్యక్రమాలకు దూరంగా ఉండటానికి కారణం కార్మిక దినోత్సవ వారాంతం మాత్రమేనని చెప్పారు.
మరోవైపు, ట్రంప్ వ్యక్తిగత వైద్యుడు షాన్ బార్బబెల్లా కూడా స్పందించారు. ఆయన చేతి గాయం నిజమేనని, కానీ అది తేలికపాటి సమస్య మాత్రమేనని స్పష్టం చేశారు. ఆరోగ్యపరంగా ఎలాంటి ఇబ్బంది లేదని, ట్రంప్ పూర్తి స్థాయిలో సక్రమంగా ఉన్నారని వెల్లడించారు.
మొత్తానికి, ట్రంప్ ఆరోగ్యంపై వచ్చిన ప్రచారాలు రాజకీయ చర్చలకు దారితీసినా, అధికారిక వర్గాలు ఆయన ఆరోగ్యంపై స్పష్టతనిచ్చాయి. ఈ ఊహాగానాలు వాస్తవం కాదని మళ్లీ మళ్లీ చెప్పడం ద్వారా వైట్ హౌస్ ప్రజల్లో నమ్మకాన్ని కలిగించడానికి ప్రయత్నిస్తోంది.