ఏపీ: కూటమి ప్రభుత్వం ఏర్పడిన తర్వాత కొత్త కొత్త కార్యక్రమాలు మొదలవుతున్నాయి. ఈ శరన్నవరాత్రి సందర్భంలో విజయవాడలో విజయవాడ ఉత్సవ్ నిర్వహించేందుకు ప్లాన్ చేసిన అధికార పార్టీకి పెద్ద అడ్డంకి తొలగిపోయింది. విపక్షం, కొన్ని హిందూ సంఘాలు పెట్టిన పిటిషన్‌ను సుప్రీంకోర్టు తిరస్కరించడంతో ఉత్సవాలకు గ్రీన్ సిగ్నల్ లభించింది.
ఈ ఉత్సవాలు సెప్టెంబర్ 22 నుంచి అక్టోబర్ 2 వరకు 11 రోజులపాటు జరిగేలా ప్రణాళికలు వేశారు. సాంస్కృతిక కార్యక్రమాలతో పాటు అంతరించిపోతున్న పురాతన కళలకు కూడా వేదిక కల్పించనున్నారు. నగరానికి అంతర్జాతీయ స్థాయిలో గుర్తింపు తీసుకురావడమే లక్ష్యంగా ప్రభుత్వం ముందడుగు వేసింది.
ముందుగా హైకోర్టు సింగిల్ బెంచ్ ఆలయ భూముల్లో వ్యాపార కార్యక్రమాలు చేయరాదని తీర్పు ఇచ్చింది. అయితే ప్రభుత్వం ద్విసభ్య ధర్మాసనాన్ని ఆశ్రయించి స్టే తెచ్చుకుంది. దీనికి వ్యతిరేకంగా సుప్రీంకోర్టును ఆశ్రయించిన పిటిషన్లను కోర్టు త్రోసిపుచ్చింది.
పిటిషనర్ వాదనల్లో సారాంశం లేదని సుప్రీంకోర్టు స్పష్టం చేసింది. దీంతో ఉత్సవాలను ఆపే ప్రయత్నాలు విఫలమయ్యాయి. ఇప్పుడు విజయవాడ ఉత్సవ్ కు ఎలాంటి అడ్డంకులు లేవు.
ఎంపీ కేశినేని చిన్ని, మంత్రి కొల్లు రవీంద్ర, స్వచ్ఛాంద్ర కార్పొరేషన్ చైర్మన్ కొమ్మారెడ్డి పట్టాభిరాం ముందుండి ఈ ప్రాజెక్టును నడిపించారు. స్థానికులు, వ్యాపారవేత్తలు కూడా పెద్ద ఎత్తున సహకారం అందిస్తున్నారు.
మొత్తానికి, ఈ విజయవాడ ఉత్సవ్ రాష్ట్రానికే కాకుండా దేశవ్యాప్తంగా ఒక ప్రత్యేక గుర్తింపు తీసుకురావడం ఖాయం అని కూటమి నేతలు విశ్వసిస్తున్నారు.