అమెరికా: భారత్, పాకిస్థాన్ మధ్య ఉద్రిక్తతలు కొనసాగుతున్న నేపథ్యంలో అమెరికా అధ్యక్షుడు డొనాల్డ్ ట్రంప్ ఆసక్తికర వ్యాఖ్యలు చేశారు. రెండు దేశాలు అణు క్షిపణులతో కాదు, పరస్పర వాణిజ్యం ద్వారా సంబంధాలను మెరుగుపరుచుకోవాలని సూచించారు.
సౌదీ అరేబియాలో జరిగిన ఓ కార్యక్రమంలో మాట్లాడిన ట్రంప్, “ఇరు దేశాల్లో తయారయ్యే అందమైన వస్తువులను పరస్పరం వర్తకం చేసుకోవాలి. అణ్వాయుధాల బదులు అర్థవంతమైన ఒప్పందాలు చేసుకోవాలి” అని పిలుపునిచ్చారు.
ట్రంప్ మాట్లాడుతూ, ఇటీవల భారత్-పాకిస్థాన్ మధ్య కాల్పుల విరమణ ఒప్పందం కుదరడంలో తన పాత్ర ఉందని, అమెరికా వాణిజ్యపరంగా ఒత్తిడి తీసుకురావడం ద్వారా శాంతిని సాధించగలిగినట్లు చెప్పారు. విదేశాంగ మంత్రి మార్కో రూబియో పాత్రను ఈ సందర్భంగా ఆయన ప్రత్యేకంగా ప్రశంసించారు.
భారత్, పాకిస్థాన్ మధ్య శక్తివంతమైన నేతల వల్లే పరిణామాలు నియంత్రణలోకి వచ్చాయని ట్రంప్ పేర్కొన్నారు. అంతేకాదు, ప్రపంచ సమస్యలకు పరిష్కార మార్గం చూపించేందుకు తాను ప్రయత్నిస్తానని చెప్పారు.
అంతర్జాతీయంగా శాంతికి మార్గం ఖచ్చితంగా వాణిజ్యం అనే సందేశాన్ని ఈ వ్యాఖ్యలతో ట్రంప్ మళ్లీ స్పష్టం చేశారు.