టాలీవుడ్లో ఫిలిం ఫెడరేషన్ ఉద్యోగులు, ఫిలిం ఛాంబర్ పెద్దల మధ్య వేతనాల పెంపు అంశం తీవ్ర స్థాయికి చేరింది. కార్మిక సంఘాలు 30 శాతం పెంపు డిమాండ్ చేస్తుండగా, నిర్మాతలు మాత్రం వర్కర్ ఆదాయం ఆధారంగా స్లాబ్ వారీగా పెంచుతామని ప్రతిపాదించారు. ఈ భేదాభిప్రాయాలు పరిష్కారం దొరకకుండా పరిస్థితిని మరింత క్లిష్టం చేశాయి.
ఈ వివాదం కారణంగా పలు సినిమా షూటింగులు మధ్యలో ఆగిపోవడంతో ప్రొడ్యూసర్లు ఇబ్బందులు ఎదుర్కొంటున్నారు. ముఖ్యంగా సెప్టెంబర్, అక్టోబర్ రిలీజ్ డేట్లు ఫిక్స్ చేసిన చిత్రాలు టైమ్లో పూర్తవుతాయో లేదో అనుమానంగా మారింది. తేదీలు మిస్ అయితే ఓటిటి, బయ్యర్ల నుంచి ఒత్తిళ్లు పెరుగుతాయి.
ఇక కొత్త రిలీజ్ డేట్లు పెట్టుకోవడం కూడా ప్రొడ్యూసర్లకు పెద్ద తలనొప్పిగా మారింది. అందుకే నిర్మాతలు వీలైనంత త్వరగా సమస్యను సర్దుబాటు చేసుకోవాలని చూస్తున్నా, ఇరువర్గాల కఠిన వైఖరి సమస్యను మరింత లాగిస్తోంది.
నిన్న నిర్మాతల సమావేశంలో తీసుకున్న నిర్ణయాన్ని కూడా కార్మిక సంఘాలు తిరస్కరించాయి. దీంతో పరిస్థితి మరింత గందరగోళంగా మారింది. పరిశ్రమలో నాలుగైదు రోజుల్లో పరిష్కారం రావాలని అందరూ ఆశిస్తున్నా, దానికి సూచనలు కనిపించడం లేదు.
ఈ నేపథ్యంలో, తనను ఎవరూ సంప్రదించలేదని, సమస్యను ఫిలిం ఛాంబరే పరిష్కరించాలంటూ చిరంజీవి చేసిన ట్వీట్ చిన్న సంచలనం రేపింది. ఇది మరింత చర్చకు దారితీసింది.
ఇప్పుడు ఈ వివాదం ముగింపుకు ఎవరు ముందుకు వస్తారన్నదే ప్రశ్న. మూడో వ్యక్తి జోక్యం తప్పనిసరిగా కనిపిస్తోంది. అది మంత్రి రూపంలోనా, లేక అగ్రహీరో చొరవతోనా అనేది వచ్చే కొన్ని రోజుల్లో స్పష్టమవుతుంది.