ఏపీ: దేశవ్యాప్తంగా ముస్లిం మైనారిటీలను కలచివేసిన వక్ఫ్ సవరణ బిల్లు బుధవారం పార్లమెంట్‌లో ప్రవేశపెట్టనున్నారు. ఈ బిల్లుపై టీడీపీకి ముస్లిం వర్గాల నుంచి వ్యతిరేకత ఎదురవుతోంది. ఎన్డీఏలో కీలక భాగస్వామిగా ఉన్న టీడీపీ, బిల్లుకు సహకరించడం చర్చనీయాంశంగా మారింది.
అయితే టీడీపీ వర్గాలు మాత్రం తమ వైఖరికి న్యాయం చేయాలని ప్రయత్నిస్తున్నాయి. బిల్లులో మూడు కీలక మార్పులను ప్రతిపాదించామని, అందులో అన్ని దాదాపు అంగీకరించబడ్డాయని చెబుతున్నాయి. వక్ఫ్ యూజర్ ఆస్తులను తిరిగి పరిశీలించరాదన్న ప్రతిపాదనకు కేంద్రం ఓకే చెప్పిందని అంటున్నారు.
జిల్లా కలెక్టర్‌కి తుది నిర్ణయం ఉండకూడదన్న సూచన కూడా మంజూరు అయ్యిందట. డిజిటల్ పత్రాల సమర్పణకు గడువు పొడిగింపు విషయమై కూడా కేంద్రం సానుకూలంగా స్పందించిందని సమాచారం.
అయితే అత్యంత కీలకమైన వక్ఫ్ ఆస్తుల్లో ముస్లిమేతరుల జోక్యం ఉండకూడదన్న సూచనను మాత్రం కేంద్రం తిరస్కరించింది. అయినా మిగతా మార్పులు చేర్చడాన్ని ఆధారంగా తీసుకొని టీడీపీ బిల్లుకు మద్దతు తెలిపింది.
ఇంకా వైసీపీ మాత్రం ఈ బిల్లుపై పూర్తిగా వ్యతిరేకంగా వ్యవహరిస్తోంది. మైనారిటీల అభిప్రాయాల్ని పట్టించుకోకుండా బిల్లు తీసుకువచ్చారని విమర్శిస్తోంది.
ఈ నేపథ్యంలో ముస్లిం వర్గాలు పార్టీ వైఖరులపై నిశితంగా గమనిస్తున్నాయి. వక్ఫ్ బిల్లుపై రాజకీయ వేడి మళ్లీ పెరిగే అవకాశాలు స్పష్టంగా కనిపిస్తున్నాయి.