తెలంగాణలో బీసీ రిజర్వేషన్ల కోసం జరుగుతున్న ఉద్యమం కొత్త మలుపు తీసుకుంది. ఈ పోరాటంలోకి బీఆర్ఎస్ నేత, మాజీ ఎంపీ కల్వకుంట్ల కవిత కుమారుడు ఆదిత్య ప్రత్యక్షంగా అడుగుపెట్టారు. 42 శాతం రిజర్వేషన్లు సాధించడమే లక్ష్యంగా బీసీ సంఘాలు చేపట్టిన రాష్ట్రవ్యాప్త బంద్లో ఆయన తల్లితో కలిసి నిరసన గళం విప్పారు.
తెలంగాణ జాగృతి ఆధ్వర్యంలో ఖైరతాబాద్ చౌరస్తాలో నిర్వహించిన మానవహారంలో కవితతో పాటు ఆదిత్య పాల్గొన్నారు. చేతిలో ప్లకార్డు పట్టుకుని, బీసీలకు న్యాయం చేయాలంటూ నినదించారు. ఈ సందర్భంగా ఆయన తొలిసారిగా మీడియా ముందుకొచ్చి ఉద్యమంపై తన అభిప్రాయాన్ని బలంగా వినిపించారు.
ఈ పోరాటం కేవలం తన తల్లి ఒక్కరే చేస్తే విజయం సాధించలేమని ఆదిత్య స్పష్టం చేశారు. రాష్ట్రంలోని ప్రతీ బీసీ బిడ్డ బాధ్యతగా భావించి, రోడ్ల మీదకు వచ్చి పోరాడాలని పిలుపునిచ్చారు. అందరూ ఏకతాటిపైకి వస్తేనే ప్రభుత్వంలో చలనం వస్తుందని, రిజర్వేషన్ల సాధన సాధ్యమవుతుందని ఆయన అన్నారు.
ఒక రాజకీయ కుటుంబం నుంచి యువతరం నేరుగా ఉద్యమంలోకి రావడం, అందులోనూ ప్రజలంతా కలిసి రావాలని పిలుపునివ్వడం ఇప్పుడు రాజకీయ వర్గాల్లో ఆసక్తికరంగా మారింది. ఆదిత్య పిలుపు బీసీ ఉద్యమానికి కొత్త ఊపునిస్తుందని, యువతను కూడా ఈ పోరాటంలో భాగస్వాములను చేస్తుందని విశ్లేషకులు భావిస్తున్నారు.