న్యూస్ డెస్క్: బీఆర్ఎస్ నుంచి సస్పెన్షన్కు గురైన కవితకు చింతమడక గ్రామం నుంచి ఆహ్వానం రావడం రాజకీయంగా చర్చనీయాంశమైంది. తన తండ్రి కేసీఆర్ రాజకీయ ప్రస్థానం ప్రారంభమైన ఊరి నుంచి వచ్చిన ఈ పిలుపు, కవితకు ఆత్మీయతతో పాటు ఊరటనూ ఇచ్చింది.
త్వరలో ప్రారంభమయ్యే బతుకమ్మ వేడుకలకు చింతమడక వాసులు పెద్ద ఎత్తున వచ్చి కవితను ఆహ్వానించారు. తెలంగాణ జాగృతి పేరిట బతుకమ్మను జాతీయ, అంతర్జాతీయ స్థాయికి తీసుకెళ్లిన కవితకు ఇది మరింత గౌరవం తీసుకువచ్చింది.
చింతమడక కేసీఆర్ స్వగ్రామం కావడం ప్రత్యేకత. అదే ఊరిని తన ‘పుట్టింటి’గా పరిగణించే కవితకు, ఈ ఆహ్వానం ప్రత్యేక అర్థం సంతరించుకుంది. చిన్ననాటి జ్ఞాపకాలు, బతుకమ్మ ఆడిన రోజుల్ని గుర్తుచేసుకుంటూ కవిత భావోద్వేగానికి లోనయ్యారు.
సస్పెన్షన్ నేపథ్యంలో తాను ఎదుర్కొంటున్న ఒత్తిడి సమయంలో గ్రామస్తుల మద్దతు తనకు బలాన్నిచ్చిందని ఆమె చెప్పడం రాజకీయ వర్గాల్లో విశ్లేషణకు దారితీస్తోంది. పరోక్షంగా బీఆర్ఎస్పై తన అసంతృప్తిని కవిత మళ్లీ స్పష్టంచేసినట్లుగా భావిస్తున్నారు.
కేసీఆర్ను నాయకుడిగా మలిచిన చింతమడక, ఇప్పుడు కవితకు ఆపన్నహస్తం చాపడం విశేషంగా మారింది. ఇది కేవలం బతుకమ్మ ఆహ్వానం మాత్రమేనా లేక భవిష్యత్తు రాజకీయాలకూ సంకేతమా అన్న చర్చలు ముదురుతున్నాయి.
మొత్తం మీద కవితకు ఊరి ఆహ్వానం, ఆమె భవిష్యత్తు రాజకీయ దారిలో కీలక మలుపు అయ్యే అవకాశం ఉందని రాజకీయ విశ్లేషకులు చెబుతున్నారు.