న్యూస్ డెస్క్: తెలంగాణ రాజకీయాల్లో కాంగ్రెస్ అనూహ్య అడుగు వేసింది. టీమిండియా మాజీ కెప్టెన్ అజారుద్దీన్ను కేబినెట్లోకి తీసుకుంది. జూబ్లీహిల్స్ ఉప ఎన్నిక వేళ, అదీ ముస్లింలకు పవిత్రమైన శుక్రవారం (జుమా) నాడు ఈ ప్రమాణ స్వీకారం జరగడం సంచలనం రేపుతోంది. ఇది రేవంత్ రెడ్డి ప్రభుత్వం వేసిన పెద్ద రాజకీయ ఎత్తుగడగా విశ్లేషకులు భావిస్తున్నారు.
ఈ నిర్ణయం వెనుక స్పష్టమైన రాజకీయ లెక్కలు కనిపిస్తున్నాయి. జూబ్లీహిల్స్ గెలుపోటములను శాసించే స్థాయిలో మైనారిటీ ఓటర్లు ఉన్నారు. మొత్తం 4 లక్షల ఓట్లలో దాదాపు 1.2 లక్షల మంది ముస్లింలే. ఈ కీలక ఓటు బ్యాంకును ఆకట్టుకోవడమే లక్ష్యంగా ఈ పదవిని కట్టబెట్టారని ప్రత్యర్థులు ఆరోపిస్తున్నారు.
ప్రమాణ స్వీకారానికి శుక్రవారాన్ని ఎంచుకోవడం కూడా వ్యూహాత్మకమే. ఇస్లాంలో ‘జుమా’ రోజుకు అత్యంత ప్రాధాన్యత ఉంది. దీనిని పవిత్ర ప్రార్థనల దినంగా భావిస్తారు. సరిగ్గా ఆ నమాజ్ సమయంలోనే మైనారిటీ నేతకు పట్టం కట్టడం ద్వారా, ఆ వర్గానికి బలమైన సందేశం పంపాలని కాంగ్రెస్ భావించినట్లు స్పష్టమవుతోంది.
కాంగ్రెస్ వేసిన ఈ ఎత్తుగడను ప్రతిపక్షాలు తీవ్రంగా వ్యతిరేకించాయి. ఎన్నికల కోడ్ అమల్లో ఉన్న సమయంలో, ఓటర్లను ప్రభావితం చేసేలా మంత్రివర్గ విస్తరణ చేపట్టడం ఏమిటని బీఆర్ఎస్, బీజేపీలు మండిపడ్డాయి. ఈ నియామకాన్ని ఆపాలని కోరుతూ రెండు పార్టీలు ఎన్నికల సంఘానికి (EC) ఫిర్యాదు చేశాయి.
అయితే, ప్రతిపక్షాల ఫిర్యాదులను, విమర్శలను కాంగ్రెస్ ప్రభుత్వం పట్టించుకోలేదు. అనుకున్న ప్రణాళిక ప్రకారమే, అజారుద్దీన్తో ప్రమాణ స్వీకారం పూర్తి చేసింది. అధికార పక్షం తన మాటే నెగ్గించుకుంది. ఈ పరిణామం బీఆర్ఎస్, బీజేపీలకు షాక్ ఇచ్చింది.
కాంగ్రెస్ అనుకున్నది సాధించింది, ‘శుక్రవారం సెంటిమెంట్’ అస్త్రాన్ని ప్రయోగించింది. అయితే, ఈ రాజకీయ వ్యూహం, ఈ సెంటిమెంట్ జూబ్లీహిల్స్ ఓటర్లపై ఎంతవరకు ప్రభావం చూపుతుందో, మైనారిటీ ఓట్లు కాంగ్రెస్ ఖాతాలో పడతాయో లేదో ఫలితాల వరకు ఆగాల్సిందే.