న్యూస్ డెస్క్: మధ్యప్రదేశ్‌లోని సత్నా జిల్లాలో చోటుచేసుకున్న ఒక అసాధారణ ఘటన సోషల్ మీడియాలో సంచలనంగా మారింది. నయాగావ్ గ్రామానికి చెందిన రామ్ స్వరూప్ అనే రైతు ఆదాయ ధ్రువీకరణ పత్రం కోసం దరఖాస్తు చేయగా, అధికారుల తప్పిదం వల్ల అతని వార్షిక ఆదాయాన్ని కేవలం రూ.3గా చూపించారు.
ఈ సర్టిఫికెట్‌లో నెలకు 25 పైసలు మాత్రమే అతడు సంపాదిస్తున్నట్లు పేర్కొనడంతో, ఇది నెట్టింట్లో విస్తృతంగా పంచుకోబడింది. ఈ సంఘటనపై నెటిజన్లు స్పందిస్తూ, దేశంలోనే అత్యంత పేద రైతుగా రామ్ స్వరూప్‌ను అభివర్ణించారు. విషయం వైరల్ కావడంతో రాజకీయ దుమారం కూడా రేగింది.
మధ్యప్రదేశ్ కాంగ్రెస్ పార్టీ ప్రభుత్వాన్ని తీవ్రంగా ఆక్షేపించింది. ముఖ్యమంత్రి మోహన్ యాదవ్ పాలనలో ప్రజలను మరింత పేదలుగా మార్చే పనులు జరుగుతున్నాయని కాంగ్రెస్ నేతలు విమర్శించారు. ‘కమీషన్ తినే కుర్చీల పాలన’ అంటూ కామెంట్స్ చేశారు.
అదే సమయంలో, అధికారుల తప్పిదం వల్లనే ఈ ఇన్‌కమ్ సర్టిఫికెట్ ఇలా వచ్చిందని జిల్లా యంత్రాంగం వివరించింది. సోషల్ మీడియా ద్వారా విమర్శలు వెల్లువెత్తడంతో, రామ్ స్వరూప్‌కు సరిచేసిన ఆదాయ ధ్రువీకరణ పత్రాన్ని జూలై 25న మళ్లీ జారీ చేశారు. తాజా సర్టిఫికెట్‌లో ఆయన ఆదాయాన్ని రూ.30,000గా నమోదు చేశారు.
ఈ ఘటన అధికార యంత్రాంగం తీరుపై మరోసారి ప్రశ్నలు రేపుతోంది. ఒక చిన్న పొరపాటు కూడా వ్యవసాయ కుటుంబాల్లోని అభద్రతను, పరువు నష్టాన్ని తెచ్చిపెట్టవచ్చు. ప్రభుత్వ శాఖలు ఇలాంటి సర్టిఫికెట్లను జారీ చేయడంలో మరింత జాగ్రత్తలు తీసుకోవాల్సిన అవసరం ఉందన్న సందేశం మిగిలింది.