స్పోర్ట్స్ డెస్క్: ప్లేఆఫ్స్‌ రేసు నుంచి నిష్క్రమించిన లఖ్‌నవూ సూపర్‌ జెయింట్స్ సీజన్‌కు గట్టి ముగింపునిచ్చింది. అగ్రస్థానంలో ఉన్న గుజరాత్‌ టైటాన్స్‌పై 33 పరుగుల తేడాతో విజయం సాధించి సత్తా చాటింది.
మొదట బ్యాటింగ్‌కు వచ్చిన లఖ్‌నవూ, మిచెల్ మార్ష్ (117) శతకంతో 2 వికెట్లకు 235 పరుగులు చేసింది. మార్ష్‌కు తోడుగా పూరన్ (56*) మెరుపులు చూపించాడు.
మార్ష్, మార్‌క్రమ్ తొలి వికెట్‌కు 91 పరుగులు, మార్ష్ – పూరన్ రెండో వికెట్‌కు 121 పరుగుల భాగస్వామ్యం జోడించి గుజరాత్‌పై ఒత్తిడిని పెంచారు. చివర్లో పంత్ (16) కేవలం 6 బంతుల్లో రెండు సిక్సర్లు కొట్టి వేగాన్ని పెంచాడు.
లక్ష్యఛేదనలో గుజరాత్‌కు శుభ్‌మన్ గిల్ (35), బట్లర్ (33), సుదర్శన్ (21) స్టార్ట్ ఇచ్చినా, పెద్ద స్కోర్ చేయలేకపోయారు. షారుక్ ఖాన్ (57), రూథర్‌ఫోర్డ్ (38) పోరాడినా ఫలితం దక్కలేదు.
లఖ్‌నవూ బౌలర్లలో ఓ రూర్క్ 3, బదోని 2, అవేశ్ 2 వికెట్లు తీసి గేమ్‌ను స్వింగ్‌ చేశారు. మహరాజ్, షాబాజ్ ఒక్కొక్క వికెట్ తీసి తోడ్పడ్డారు. ఈ విజయం ద్వారా లఖ్‌నవూ గౌరవ ప్రదర్శనతో సీజన్ ముగించింది. మార్ష్ శతకం మ్యాచ్ హీరోగా నిలిచింది.