న్యూస్ డెస్క్: తెలంగాణలో సంచలనం రేపిన వామనరావు, నాగమణి హత్య కేసు ఇప్పుడు సీబీఐ దర్యాప్తుకు వెళ్లింది. సుప్రీంకోర్టు మంగళవారం ఈ కేసును సీబీఐకి అప్పగిస్తూ కీలక ఆదేశాలు జారీ చేసింది.
హైదరాబాద్కు చెందిన న్యాయవాద దంపతులు వామనరావు, నాగమణి 2021 ఫిబ్రవరిలో పెద్దపల్లి జిల్లాలో దారుణ హత్యకు గురయ్యారు. నడిరోడ్డుపై కత్తులతో దాడి చేసిన ఈ ఘటన దేశవ్యాప్తంగా ఆగ్రహం రేపింది. అప్పట్లో న్యాయవాదులు పెద్ద ఎత్తున నిరసనలు వ్యక్తం చేశారు.
కేసు విచారణలో మొదట ప్రత్యేక దర్యాప్తు బృందం (SIT) ఏర్పాటయింది. కానీ వామనరావు తండ్రి అసలు నిందితులను వదిలేస్తున్నారని ఆరోపించి, సీబీఐ దర్యాప్తు కోసం సుప్రీంకోర్టును ఆశ్రయించారు.
సుప్రీంకోర్టు ఇప్పటికే రెండు సార్లు విచారణ జరిపింది. తాజాగా తెలంగాణ ప్రభుత్వం కూడా ఈ కేసు సీబీఐకి ఇవ్వడంపై ఎలాంటి అభ్యంతరం లేదని అఫిడవిట్ సమర్పించింది. ఇది కోర్టు నిర్ణయానికి మరింత బలం చేకూర్చింది.
మరణ వాంగ్మూలం నిజమని ఎఫ్ఎస్ఎల్ నివేదిక నిర్ధారించడంతో, సుప్రీంకోర్టు దర్యాప్తును సీబీఐకి అప్పగించింది. రాజకీయ ఒత్తిళ్లు, అధికార ప్రభావాలు పక్కనపెట్టి న్యాయం జరగాలని కోర్టు స్పష్టం చేసింది.
ఈ కేసు విచారణకు సమయపరిమితి ప్రకటించకపోయినా, సుప్రీంకోర్టు నివేదికను నేరుగా తమకే అందించాలని సీబీఐని ఆదేశించింది. ఇప్పుడు ఈ కేసు మలుపు తిరిగే అవకాశం కనిపిస్తోంది.