తిరుమలలో రీల్స్పై టీటీడీ హెచ్చరిక: పవిత్రతకు భంగం చేస్తే కఠిన చర్యలు
తిరుమల: శ్రీవారి ఆలయం భారతదేశంలోని అత్యంత పవిత్రమైన ప్రదేశాలలో ఒకటి. అయితే ఇటీవల అక్కడ మాడ వీధుల్లో, ఆలయం ముందు రీల్స్, షార్ట్స్ కోసం యువత ఉత్సాహంగా వీడియోలు తీయడం పెరిగిపోయింది. సోషల్ మీడియాలో ఫేమ్ కోసం ఇలాంటి చర్యలు చేయడాన్ని టీటీడీ తీవ్రంగా ఖండించింది.
తిరుమల పవిత్రతను కాపాడేందుకు టీటీడీ ప్రత్యేకంగా విజిలెన్స్, సెక్యూరిటీ బృందాలను ఏర్పాటు చేసింది. ఆలయం పరిసరాల్లో ఎవరైనా వీడియోలు తీసి, వాటిని సోషల్ మీడియాలో పోస్ట్ చేస్తే వారిపై కఠిన చర్యలు తప్పవని స్పష్టంచేసింది.
భక్తుల మనోభావాలకు, ఆధ్యాత్మిక వాతావరణానికి భంగం కలిగించేలా వ్యవహరించిన వారిపై కేసులు నమోదు చేస్తామని హెచ్చరించింది.
ఫోటోలు, వీడియోలు తీసుకోవడం వరకు పరిమితమైతే సమాజానికి అపవాదేం లేదు. కానీ, వేడుకలు, డ్యాన్సులు చేయడం, హద్దులు మీరిన ప్రవర్తన మాత్రం తిరుమల పవిత్రతకు విఘాతం కలిగిస్తుందని టీటీడీ పేర్కొంది.
ఈ రకమైన చర్యలు భక్తుల మనోభావాలను దెబ్బతీసేలా ఉంటాయని, ప్రతి ఒక్కరు జాగ్రత్తగా వ్యవహరించాలని టీటీడీ విజ్ఞప్తి చేసింది.