తిరుమల: శ్రీవెంకటేశ్వర స్వామిని దర్శించుకోవాలంటే తప్పనిసరిగా టికెట్ ఉండాలి, ముందుగానే ప్లాన్ చేసుకోవాలి అనుకునేవారికి టీటీడీ ఇచ్చే మార్గాలు చాలా ఉన్నాయి. ఇక ఆకస్మికంగా తిరుమలకెళ్లే భక్తులకు కూడా దర్శనం కోసం ఎన్నో సౌకర్యాలు సిద్ధంగా ఉన్నాయి. ఇలా టికెట్ లేకపోయినా, ముందస్తు ప్రణాళిక లేకపోయినా శ్రీవారి దర్శనం సాధ్యం.
తిరుపతి విష్ణు నివాసం, శ్రీనివాసం, భూదేవి కాంప్లెక్స్లలో ప్రతిరోజూ క్యూ లైన్లో ఆధార్ చూపించి దర్శన టోకెన్లు తీసుకోవచ్చు. ఏడాది లోపు చిన్నపిల్లలున్న తల్లిదండ్రులకు సుపథం మార్గంలో ప్రత్యేక దర్శన అవకాశాన్ని టీటీడీ ఇస్తోంది.
వృద్ధులు, దివ్యాంగులకు రోజుకు 750 ఆన్లైన్ టికెట్లు కేటాయిస్తారు. అనారోగ్యంతో ఉన్న భక్తులకు బయోమెట్రిక్ ద్వారం ద్వారా స్పెషల్ ఎంట్రీ ఉంటుంది, దీనికోసం ముందుగా సమాచారం ఇవ్వాలి. భారత సైన్యానికి చెందిన ఫీల్డ్ స్టాఫ్కు రూ. 300 టికెట్ నేరుగా అందుతుంది.
టీటీడీ అశ్విని ఆసుపత్రిలో రక్తదానం చేసిన భక్తులకు రోజుకు ఐదుగురికి సుపథం మార్గంలో దర్శన అవకాశం ఉంటుంది. అలిపిరిలోని సప్తగోప్రదక్షిణ మందిరంలో శ్రీనివాస దివ్యానుగ్రహ హోమం నిర్వహించాక, టికెట్ ద్వారా ఇద్దరికీ రూ. 300 దర్శన టికెట్లు లభిస్తాయి.
విదేశీయులు, ప్రవాస భారతీయులు నెలలోపు తిరుగు ప్రయాణం ఉంటే, పాస్పోర్ట్, ఇమిగ్రేషన్ స్టాంప్ చూపించి రూ. 300 టికెట్ పొందవచ్చు. ప్రవాసాంధ్రులు ఏపీఎన్ఆర్టీఎస్ ద్వారా రోజుకు 100 మందికి వీఐపీ బ్రేక్ దర్శనం పొందొచ్చు. కొత్త దంపతులు వివాహ ధృవీకరణ పత్రంతో కల్యాణోత్సవం టికెట్లను పొందవచ్చు.
శ్రీవాణి ట్రస్టుకు రూ. 10 వేలు విరాళంతో, రూ. 500 చెల్లించి టికెట్ తీసుకుంటే ప్రత్యేక దర్శనం లభిస్తుంది. 1500 శ్రీవాణి టికెట్లలో ఆన్లైన్లో 500, రేణిగుంట ఎయిర్పోర్టులో 200, తిరుమలలో 800 లభిస్తాయి.
శాసనసభ, పార్లమెంటు సభ్యుల సిఫార్సుతో వీఐపీ దర్శనం, వసతి లభిస్తుంది. ఐఏఎస్, ఐపీఎస్ అధికారుల సిఫార్సుతోనూ వీటి కోసం అవకాశం ఉంది. శ్రీవారికి భారీ విరాళం అందించే దాతలకు ప్రత్యేక డోనర్ పుస్తకం, ఐదుగురికి దర్శన భాగ్యం లభిస్తుంది.
గోవింద నామ కోటి రాసిన యువత (25 ఏళ్లు లేదా తక్కువ వయసు) కూడా వీఐపీ దర్శనానికి అర్హులు. ఇలా టికెట్ లేకపోయినా, టీటీడీ చేసే సదుపాయాల ద్వారా తిరుమల శ్రీవారిని సులభంగా దర్శించుకోవచ్చు.