న్యూస్ డెస్క్: ప్రపంచ టెస్టు ఛాంపియన్షిప్ (WTC) ఫైనల్ చేరాలన్న టీమిండియా ఆశలపై నీలినీడలు కమ్ముకున్నాయి. ఇప్పటికే రెండుసార్లు ఫైనల్కు చేరి రన్నరప్తో సరిపెట్టుకున్న భారత్, మూడోసారైనా గదను ముద్దాడాలనుకుంది.
కానీ న్యూజిలాండ్తో స్వదేశంలో ఓటమి, ఆస్ట్రేలియాతో సిరీస్ కోల్పోవడం, తాజాగా కోల్కతా వేదికగా సౌతాఫ్రికా చేతిలో అనూహ్య పరాజయంతో పరిస్థితి సంక్లిష్టంగా మారింది. ప్రస్తుతం భారత్ పాయింట్ల పట్టికలో నాలుగో స్థానానికి (54.17%) పడిపోయింది.
ఇప్పుడు టీమిండియా ముందున్నది చాలా కఠినమైన సమీకరణం. ఈ సైకిల్లో రోహిత్ సేన ఇంకా 10 టెస్టులు ఆడాల్సి ఉంది. ఫైనల్ బెర్త్ ఖాయం చేసుకోవాలంటే ఇందులో ఏకంగా 8 మ్యాచ్లు గెలిచి తీరాల్సిందే. ఒక్క మ్యాచ్ డ్రా అయినా లేదా ఓడినా ఫైనల్ అవకాశాలు గల్లంతవుతాయి. గువాహటిలో నవంబర్ 22న మొదలయ్యే రెండో టెస్టు నుంచే ఈ ‘డూ ఆర్ డై’ పోరాటం షురూ కానుంది.
గత రికార్డులను బట్టి చూస్తే.. డబ్ల్యూటీసీ ఫైనల్కు అర్హత సాధించాలంటే కనీసం 64 నుంచి 68 శాతం పాయింట్లు ఉండాలి. ప్రస్తుతం మనకంటే శ్రీలంక, సౌతాఫ్రికా, ఆస్ట్రేలియా జట్లు ముందున్నాయి. మిగిలిన 10 మ్యాచుల్లో 8 గెలిస్తే భారత్ పాయింట్ల శాతం 68.52కి చేరుతుంది. అప్పుడు మాత్రమే ఫైనల్ బెర్తుకు ఢోకా ఉండదు. ఒకవేళ 7 మ్యాచ్లే గెలిస్తే మాత్రం 62.96 శాతంతో ఇతరుల ఫలితాలపై ఆధారపడాల్సి వస్తుంది.
షెడ్యూల్ ప్రకారం.. గువాహటి టెస్టు తర్వాత, శ్రీలంకలో 2, న్యూజిలాండ్లో 2, ఆ తర్వాత స్వదేశంలో ఆస్ట్రేలియాతో 5 టెస్టులు ఆడాల్సి ఉంది. లంకను వారి గడ్డపై ఓడించడం సాధ్యమే అయినా.. కివీస్ గడ్డపై గెలవడం, ఆస్ట్రేలియాతో 5 మ్యాచ్ల సిరీస్లో సత్తా చాటడం అంత సులభం కాదు. ముఖ్యంగా ఈడెన్ గార్డెన్స్ ఓటమి తర్వాత జట్టు ఆత్మవిశ్వాసం ఎలా ఉందనేది ఇప్పుడు కీలకం.
సౌతాఫ్రికా టైటిల్ ఎగరేసుకుపోయి పరోక్షంగా మనకు దెబ్బకొడితే, ఇప్పుడు సిరీస్లోనూ మనల్ని ఇబ్బంది పెడుతోంది. అందుకే గువాహటి టెస్టులో గెలిచి మళ్లీ విజయాల బాట పట్టడమే టీమిండియా ముందున్న ఏకైక మార్గం. ప్రతి మ్యాచ్ను నాకౌట్లా భావించి ఆడితే తప్ప మూడోసారి డబ్ల్యూటీసీ ఫైనల్ చేరడం కలే అవుతుంది.