న్యూస్ డెస్క్: సీనియర్ ఆటగాళ్లు విరాట్ కోహ్లీ, రోహిత్ శర్మలను పక్కనపెట్టే నిర్ణయం టీమిండియాకు ఏ మాత్రం మంచిది కాదని, దీని వల్ల భారత క్రికెట్ భారీ మూల్యం చెల్లించుకోవాల్సి వస్తుందని ఇంగ్లండ్ మాజీ ఫాస్ట్ బౌలర్ స్టీవ్ హార్మిసన్ గట్టిగా హెచ్చరించాడు.
ముఖ్యంగా ఆస్ట్రేలియా, ఇంగ్లండ్ లాంటి బలమైన జట్లతో 350 పరుగుల లక్ష్యాన్ని ఛేదించాల్సిన కీలక సందర్భాలలో, 90 సగటు ఉన్న కోహ్లీ లాంటి ఆటగాడు లేకపోవడం జట్టుకు పెద్ద లోటని ఆయన అభిప్రాయపడ్డాడు.
ప్రస్తుత చీఫ్ సెలక్టర్ అజిత్ అగార్కర్కు ముందుముందు గడ్డు కాలం తప్పదని, మాజీ కెప్టెన్లతో పెట్టుకుంటే ఆయన పదవీకాలం గందరగోళంగా ముగుస్తుందని హార్మిసన్ జోస్యం చెప్పాడు. ఈ అధికార పోరులో కోహ్లీ, రోహిత్లదే పైచేయి అవుతుందని ఆయన పేర్కొన్నాడు. ముఖ్యంగా వన్డే క్రికెట్లో రోహిత్ కంటే విరాట్ కోహ్లీకి ఎక్కువ పలుకుబడి, వారసత్వం ఉందని ఆయన స్పష్టం చేశాడు.
భారత క్రికెట్లో సీనియర్ ఆటగాళ్ల భవిష్యత్తుపై జరుగుతున్న అంతర్గత పరిణామాలను ఇది సూచిస్తోంది. అగార్కర్ ఇటీవల శుభ్మన్ గిల్ను కెప్టెన్గా నియమించడం, దక్షిణాఫ్రికా ప్రపంచకప్కు రోహిత్, కోహ్లీల ఎంపికపై స్పష్టత ఇవ్వకపోవడం వంటి అంశాలు ఈ చర్చకు దారితీశాయి.
కోహ్లీ, రోహిత్ శర్మ ఇప్పటికే టెస్టులు, టీ20 ఫార్మాట్ల నుంచి తప్పుకున్నారు. ఇప్పుడు కేవలం వన్డే ఫార్మాట్లో మాత్రమే ఆడుతున్నారు. అయినా కూడా, వారిని కూడా పక్కనపెట్టి యువ ఆటగాళ్లతో జట్టును పునర్నిర్మించే దిశగా సెలక్టర్లు ఆలోచనలు చేస్తుండటం వల్లే ఈ వివాదం మొదలైంది.