ఏపీలో కూటమి ప్రభుత్వం ప్రతిపక్ష వైసీపీపై కేసుల ఒత్తిడి పెంచుతున్న వేళ, బీజేపీ ఎమ్మెల్యే ఆదినారాయణ రెడ్డి చేసిన తాజా వ్యాఖ్యలు పెను సంచలనం సృష్టిస్తున్నాయి. మాజీ సీఎం వైఎస్ జగన్ను టార్గెట్ చేస్తూ ఆయన మాట్లాడారు. లిక్కర్ స్కామ్లో జగన్ జైలుకు వెళ్లడం ఖాయమని ఆది నారాయణ రెడ్డి చేసిన వ్యాఖ్యలు, జగన్ అరెస్టుకు రంగం సిద్ధమవుతోందన్న అనుమానాలకు బలం చేకూరుస్తున్నాయి.
బుధవారం మీడియాతో మాట్లాడిన ఆదినారాయణ రెడ్డి, జగన్పై తీవ్ర ఆరోపణలు చేశారు. బాబాయ్ వైఎస్ వివేకానందరెడ్డి హత్య కేసుతో పాటు, ఏపీ లిక్కర్ స్కామ్లో కూడా జగన్ పాత్ర ఉందని ఆయన ఆరోపించారు. ఈ రెండు కేసుల్లోనూ ఆయనకు ఉచ్చు బిగుస్తోందని, అరెస్టు తప్పదని ఆయన వ్యాఖ్యానించారు.
వివేకా హత్య కేసు దర్యాప్తులో ఏ2 నిందితుడు సునీల్ యాదవ్ ఇటీవల సంచలన విషయాలు వెల్లడిస్తుండటం, అసలు దోషులను పట్టుకోవాలని సునీత డిమాండ్ చేస్తుండటంతో ఈ కేసు మళ్లీ జగన్ వైపు తిరుగుతోందనే చర్చ జరుగుతోంది.
అదే సమయంలో, రూ. 3,500 కోట్ల లిక్కర్ స్కామ్పై సిట్ దర్యాప్తు ముమ్మరంగా సాగుతోంది. సిట్ దాఖలు చేసిన చార్జిషీట్లో జగన్ పేరును ప్రస్తావించడం, (నిందితుడిగా కాకపోయినా) ఇప్పుడు ఆయన అరెస్టుకు సంకేతమేనని న్యాయ నిపుణులు విశ్లేషిస్తున్నారు.
ఎమ్మెల్యే ఆదినారాయణ రెడ్డి వ్యాఖ్యల వెనుక ప్రభుత్వ వ్యూహం ఉందా, లేక కేవలం రాజకీయ ఆరోపణలా అనే దానిపై స్పష్టత లేదు. అయితే, ఆధారాలు లేకుండా అరెస్టు సాధ్యం కాదని కొందరు అంటున్నా, ఈ వ్యాఖ్యలు వైసీపీ శ్రేణుల్లో మాత్రం తీవ్ర కలకలం రేపుతున్నాయి.