న్యూస్ డెస్క్: భారత క్రికెట్ అభిమానులకు అక్టోబర్ 23, ఒక సాధారణ గురువారం కాదు, ఇది ఒక “సూపర్ థర్స్డే”. ఈ ఒక్కరోజే టీమిండియా పురుషుల, మహిళల జట్ల భవితవ్యాన్ని నిర్దేశించనుంది. రెండు జట్లూ వేర్వేరు టోర్నీలలో “డూ ఆర్ డై” మ్యాచ్లకు సిద్ధమయ్యాయి, దీంతో దేశవ్యాప్తంగా తీవ్ర ఉత్కంఠ నెలకొంది.
ఆస్ట్రేలియా గడ్డపై శుభ్మన్ గిల్ నేతృత్వంలోని పురుషుల జట్టు, మూడు వన్డేల సిరీస్లో ఇప్పటికే 0-1తో వెనుకబడింది. సీనియర్లు రోహిత్ శర్మ, విరాట్ కోహ్లీ తిరిగి జట్టులోకి వచ్చినా, తొలి వన్డేలో విఫలమయ్యారు. సిరీస్లో నిలవాలంటే అడిలైడ్ ఓవల్లో జరిగే ఈ రెండో వన్డేలో గెలిచి తీరాల్సిందే.
అభిమానుల కళ్లన్నీ మరోసారి విరాట్ కోహ్లీపైనే ఉన్నాయి. అడిలైడ్ అతనికి అచ్చొచ్చిన మైదానం. ఈ మ్యాచ్లో అతను తన మ్యాజిక్ను పునరావృతం చేసి, రోహిత్తో కలిసి జట్టును గెలిపించాలని యావత్ దేశం కోరుకుంటోంది. ఇక్కడ ఓడితే సిరీస్ ఆస్ట్రేలియా వశమవుతుంది.
పురుషుల జట్టు విదేశంలో సిరీస్ కోసం పోరాడుతుంటే, మహిళల జట్టు స్వదేశంలో ప్రపంచకప్ మనుగడ కోసం యుద్ధం చేస్తోంది. సొంతగడ్డపై జరుగుతున్న ఐసీసీ మహిళల ప్రపంచకప్ 2025లో భారత జట్టు సెమీస్ ఆశలు సంక్లిష్టంగా మారాయి.
న్యూజిలాండ్తో నేడు జరిగే మ్యాచ్ టీమిండియాకు ఇది వర్చువల్ క్వార్టర్ ఫైనల్ లాంటిది. ఈ మ్యాచ్లో గెలిస్తేనే సెమీస్ ఆశలు సజీవంగా ఉంటాయి. ఓటమి పాలైతే, ప్రపంచకప్ కల స్వదేశంలోనే కల్లలవుతుంది. స్మృతి మంధాన, హర్మన్ప్రీత్ కౌర్ వంటి సీనియర్లు రాణించాల్సిన సమయం ఇది.
ఒకే రోజు, రెండు కీలక పోరాటాలు.. ఒకటి సిరీస్ను కాపాడుకోవడానికి, మరొకటి ప్రపంచకప్ కలను నిలబెట్టుకోవడానికి. ఈ రెండు మ్యాచ్ల ఫలితాల కోసం దేశమంతా ఉత్కంఠగా ఎదురుచూస్తోంది.