అమెరికాలో వలసదారులపై కఠిన విధానాలు పెరుగుతున్నాయి. ఫ్లోరిడా గవర్నర్ రాన్ డిసాంటిస్ తాజాగా మరో సంచలన నిర్ణయం తీసుకున్నారు. రాష్ట్రంలోని ప్రభుత్వ విశ్వవిద్యాలయాల్లో ఇకపై H-1B వీసా కలిగిన విదేశీ ఉద్యోగులను కొత్తగా నియమించరాదని ఆయన ఆదేశించారు.
ఈ నిర్ణయం వెనుక “ఫ్లోరిడా పౌరులకే ఉద్యోగాల్లో మొదటి ప్రాధాన్యం” అనే నినాదం ఉంది. స్థానికులు సులభంగా చేయగల ఉద్యోగాలకు కూడా H-1B వీసాలను “చౌక కార్మికుల” కోసం వాడుకుంటున్నారని డిసాంటిస్ తీవ్రంగా విమర్శించారు. “అక్రిడిటేషన్ అంచనా వేయడానికి కూడా మనకు వ్యక్తులు లేరా?” అని ఆయన ప్రశ్నించారు.
రాష్ట్ర ప్రభుత్వ సమీక్షలో, H-1B వీసాపై అసిస్టెంట్ ప్రొఫెసర్లు, అనలిస్టులు, కోఆర్డినేటర్లు, స్పోర్ట్స్, కమ్యూనికేషన్ విభాగాల సిబ్బంది వంటి అనేక రకాల ఉద్యోగాల్లో విదేశీయులు ఉన్నట్లు తేలింది. ఈ నిర్ణయం భారత్, చైనా, యూకే, కెనడా వంటి దేశాల నుంచి వచ్చే నిపుణులపై తీవ్ర ప్రభావం చూపనుంది.
ట్రంప్ ప్రభుత్వ “అమెరికన్ వర్కర్స్ ఫస్ట్” విధానానికి అనుగుణంగానే డిసాంటిస్ ఈ అడుగు వేసినట్లు కనిపిస్తోంది. ఇటీవల హోంల్యాండ్ సెక్యూరిటీ విభాగం H-1B వీసాలపై కొత్త మార్గదర్శకాలను విడుదల చేసిన కొద్ది రోజులకే ఫ్లోరిడా ఈ చర్య తీసుకోవడం గమనార్హం.
ప్రస్తుతం H-1B సంస్కరణలపై యూఎస్ చాంబర్ ఆఫ్ కామర్స్ వంటి సంస్థలు న్యాయపోరాటం చేస్తున్నా, వైట్ హౌస్ మాత్రం వెనక్కి తగ్గడం లేదు. స్థానిక వేతనాలను కాపాడేందుకే ఈ మార్పులని గట్టిగా వాదిస్తోంది.
ఫ్లోరిడా గవర్నర్ తాజా నిర్ణయం అక్కడి ఉన్నత విద్యా వ్యవస్థపై, పరిశోధనలపై దీర్ఘకాలిక ప్రభావం చూపే అవకాశం ఉంది. స్థానికులు ఈ నిర్ణయాన్ని స్వాగతిస్తుండగా, విదేశీ నిపుణులు, విశ్వవిద్యాలయ వర్గాలు మాత్రం ఆందోళన వ్యక్తం చేస్తున్నాయి.