అమెరికాలో డొనాల్డ్ ట్రంప్ తిరిగి అధ్యక్షుడు అయిన నేపథ్యంలో హెచ్-1బీ వీసాల వ్యవహారం మళ్లీ తెరపైకి వచ్చింది. ఈ క్రమంలో భారతీయ, అమెరికన్ దౌత్యవేత్త మహవాష్ సిద్ధిఖీ సంచలన వ్యాఖ్యలు చేశారు.
చెన్నై కాన్సులేట్లో (2005-2007) పనిచేసిన సిద్ధిఖీ, హెచ్-1బీ వీసా కార్యక్రమంలో విస్తృతమైన మోసం జరిగిందని ఆరోపించారు. భారతీయులకు జారీ చేయబడిన వర్కింగ్ వీసాలలో ఎక్కువ భాగం మోసపూరితంగా పొందబడ్డాయని ఆమె తెలిపారు.
నకిలీ డిగ్రీలు, అర్హత సాధించడానికి తగినంత నైపుణ్యం లేని దరఖాస్తుదారులకు కూడా హెచ్-1బీ వీసాలు లభించాయని సిద్ధిఖీ ఆరోపించారు. ప్రపంచంలోనే అతిపెద్ద హెచ్-1బీ పోస్టులలో ఒకటైన చెన్నైలో ఈ మోసం పెద్ద ఎత్తున జరిగింది.
తాను ఆ సమయంలో మోసాన్ని గుర్తించి, విదేశాంగ కార్యదర్శికి సమాచారం అందించానని సిద్ధిఖీ తెలిపారు. అయితే, రాజకీయ ఒత్తిడి కారణంగా ఎటువంటి చర్య తీసుకోలేదని ఆమె పేర్కొన్నారు. భారతీయ రాజకీయ నాయకులను సంతృప్తి పరచడానికి ఈ మోసం జరిగిందని ఆరోపించారు.
ఈ సందర్భంగా ఆమె భారత్లో మోసం, లంచం రొటీన్ గా మారిపోయాయని వ్యాఖ్యానించారు. ఒక భారతీయ అమెరికన్గా ఇలా చెప్పడానికి ఇష్టపడను అని చెబుతూనే, ఆమె చేసిన ఈ సంచలన వ్యాఖ్యలు పెద్ద ఎత్తున చర్చకు దారితీశాయి.
ఈ ఆరోపణలు హెచ్-1బీ ప్రోగ్రామ్లో రాజకీయ జోక్యం, స్థానిక అవినీతి కారణంగా నాణ్యత ఎలా దెబ్బతిందనే విషయాన్ని స్పష్టం చేస్తున్నాయి. సిద్ధిఖీ ఆరోపణల నిజానిజాలు ఇప్పుడు ప్రపంచవ్యాప్తంగా చర్చనీయాంశంగా మారాయి.