పాకిస్థాన్ బలోచిస్థాన్‌లో ప్రవేశపెట్టిన ఉగ్రవాద వ్యతిరేక (సవరణ) చట్టం 2025పై తీవ్ర వ్యతిరేకత వెల్లువెత్తుతోంది. బలూచ్ ప్రజలను లక్ష్యంగా చేసుకునే విధంగా చట్టం ఉందని విమర్శలు ఉన్నాయి.
ఈ చట్టం ప్రకారం ఎటువంటి ఆధారాలు లేకపోయినా కేవలం అనుమానం పేరుతో వ్యక్తులను అరెస్ట్ చేయవచ్చని నిబంధనలు ఉన్నాయి. అంతేగాక 90 రోజులపాటు కోర్టు ఆదేశాలు లేకుండా నిర్బంధించే అధికారం పోలీసులకు, నిఘా సంస్థలకు దక్కుతుంది.
జేఐటీ పేరుతో ఏర్పడే సంయుక్త బృందాలు ముందస్తు అనుమతులు లేకుండా సోదాలు, స్వాధీనాలు చేయవచ్చునని నిపుణులు హెచ్చరిస్తున్నారు. ఇది మౌలిక హక్కుల ఉల్లంఘన అని మానవ హక్కుల సంస్థలు అంటున్నాయి.
హ్యూమన్ రైట్స్ వాచ్, ఆమ్నెస్టీ ఇంటర్నేషనల్, హెచ్‌ఆర్‌సీపీ వంటి సంస్థలు ఈ చట్టాన్ని తీవ్రంగా ఖండించాయి. రాజ్యాంగబద్ధ రక్షణలు పక్కనపెట్టి ప్రభుత్వ చర్యలకు చట్టబద్ధత ఇవ్వడమేనని వారు ఆరోపించారు.
బలోచిస్థాన్‌లో ఇప్పటికే అదృశ్యాలు, నిర్బంధాలు కొనసాగుతుండగా ఈ చట్టం ప్రజల్లో భయాందోళన పెంచుతోందని విశ్లేషకులు చెబుతున్నారు. బీవైసీ ఈ చర్యలను ప్రజాస్వామ్య విఘాతంగా అభివర్ణించింది.
పౌర హక్కులను గౌరవించని ఈ చట్టం సవరణను తక్షణమే ఉపసంహరించాలంటూ ఆందోళనలు బలంగా వెలువడుతున్నాయి.