తెలంగాణ: ప్రభుత్వం వినాయక చవితి, దసరా పండుగల సందర్భంగా గణేష్, దుర్గా మండపాలకు ప్రత్యేక శుభవార్త చెప్పింది. రాష్ట్రవ్యాప్తంగా అన్ని మండపాలకు ఉచితంగా విద్యుత్ సరఫరా చేస్తామని అధికారికంగా ప్రకటించింది. ఈ నిర్ణయంతో పండుగ నిర్వాహక కమిటీలకు పెద్ద ఊరట లభించింది.
టీఎస్ఎస్పీడీసీఎల్ ఉత్తర్వుల ప్రకారం, ఆగస్టు 27 నుంచి సెప్టెంబర్ 6 వరకు వినాయక నవరాత్రులు, సెప్టెంబర్ 29 నుంచి అక్టోబర్ 12 వరకు దుర్గా నవరాత్రుల సమయంలో మండపాలకు విద్యుత్ ఉచితంగా అందించనున్నారు. అనుమతి పొందిన నిర్వాహకులందరికీ ఈ సౌకర్యం వర్తిస్తుంది.
మండపాల ఏర్పాటుకు నిర్వాహకులు ఆన్లైన్లో పోలీసుల నుంచి అనుమతి తప్పనిసరిగా పొందాలని సూచించారు. అలాగే విద్యుత్ శాఖ నుంచి సాంకేతిక అనుమతి తీసుకోవాలని ఆదేశించారు. రాత్రి 10 గంటల తర్వాత మైక్లు వాడరాదని, శబ్ద పరిమితిని పాటించాలని హెచ్చరించారు.
ప్రతి మండపంలో సీసీటీవీ కెమెరాలు ఏర్పాటు చేయాలని, అగ్నిప్రమాద నివారణ పరికరాలు సిద్ధంగా ఉంచాలని ప్రభుత్వం ఆదేశించింది. డీజేలు, బాణసంచా కాల్చడం పూర్తిగా నిషేధించబడింది. రోడ్లు పూర్తిగా మూసివేయకూడదని కూడా స్పష్టం చేశారు.
హైదరాబాద్ డీసీపీ స్నేహా మెహ్రా నిర్వాహకులతో సమన్వయ సమావేశం నిర్వహించి, విగ్రహాల నిమజ్జనం వరకు పోలీసుల పర్యవేక్షణ ఉంటుందని హామీ ఇచ్చారు. భక్తులు శాంతియుత వాతావరణంలో పండుగను జరుపుకోవాలని ఆమె విజ్ఞప్తి చేశారు.