న్యూస్ డెస్క్: వైసీపీ సీనియర్ నేత ముద్రగడ పద్మనాభం ఆరోగ్య సమస్యలతో బాధపడుతున్న విషయం తెలిసిందే. కిడ్నీ సంబంధిత సమస్యలతో బాధపడుతున్న ఆయనను మెరుగైన చికిత్స కోసం హైదరాబాద్‌కు తరలించారు. కాకినాడ ప్రభుత్వ ఆసుపత్రిలో డయాలసిస్ చికిత్స పొందుతున్న ముద్రగడను అక్కడి నుంచి డిశ్చార్జ్ చేశారు.
ఆయన ప్రత్యేక అభ్యర్థన మేరకు, ముందుగా కిర్లంపూడిలోని తన నివాసానికి తీసుకెళ్లారు. అక్కడ కొంతసేపు గడిపిన ముద్రగడను కుటుంబ సభ్యులు, బంధువులు, అభిమానులు పరామర్శించారు. త్వరగా కోలుకోవాలని ఆకాంక్షిస్తూ అతని ఆరోగ్యంపై ప్రార్థనలు చేశారు.
ఆ తర్వాత ముద్రగడను హైదరాబాద్‌కు తరలించే ప్రక్రియ మొదలైంది. తొలుత ఎయిర్ అంబులెన్స్‌లో తీసుకెళ్లే ప్రణాళికలు ఉన్నా, ముద్రగడ అభ్యంతరం చెప్పడంతో ఆ యోజనను విరమించారు.
దీంతో రోడ్డు మార్గంలో ప్రత్యేక అంబులెన్స్ ద్వారా ఆయనను హైదరాబాద్‌కు తీసుకెళ్లారు. వైద్యుల పర్యవేక్షణలో ప్రయాణం సురక్షితంగా సాగుతోంది.