న్యూస్ డెస్క్: భారత వాయుసేన కోసం చరిత్రలోనే అతిపెద్ద యుద్ధవిమానాల ఒప్పందం కుదిరింది. దేశీయంగా తయారైన తేజస్ మార్క్ 1A ఫైటర్లను కొనుగోలు చేయడానికి రక్షణ మంత్రిత్వశాఖ రూ.62,370 కోట్లతో కాంట్రాక్ట్ చేసింది. మొత్తం 97 విమానాలు ఈ ఒప్పందంలో భాగం అవుతాయి.
ఇందులో 68 సింగిల్ సీటర్ ఫైటర్లు, 29 ట్విన్ సీటర్ ట్రైనర్లు ఉండనున్నాయి. 2027 నుంచి డెలివరీలు ప్రారంభమై, 6 ఏళ్లలో పూర్తి చేస్తారు. దీంతో వాయుసేనలో మిగ్-21 జెట్స్ స్థానంలో తేజస్ జెట్లు రానున్నాయి. ఇదే సమయానికి మిగ్-21 చివరి స్క్వాడ్రన్లు రిటైర్ అవుతుండటం విశేషం.
ఈ కొత్త ఒప్పందం ముందు 2021లో 83 తేజస్ విమానాల కోసం రూ.46,898 కోట్ల డీల్ జరిగింది. కానీ దానిలో ఆలస్యం జరిగింది. ఈసారి క్యాబినెట్ కమిటీ ఆన్ సెక్యూరిటీ వేగంగా అనుమతినిచ్చింది.
తాజా తేజస్ మోడల్స్లో AESA రాడార్, ఎలక్ట్రానిక్ వార్ఫేర్ సూట్, స్వదేశీ టెక్నాలజీతో 67 కొత్త ఫీచర్లు చేరుతున్నాయి. దీంతో విమానాల శక్తి మరింత పెరుగుతుంది.
ఈ ప్రాజెక్టులో 100కి పైగా భారత కంపెనీలు భాగస్వామ్యం అవుతాయి. దీని వల్ల ప్రతి సంవత్సరం వేలాది ఉద్యోగాలు సృష్టి అవుతాయని అంచనా. దేశీయ రక్షణ రంగానికి ఇది పెద్ద బలంగా మారనుంది.
అలాగే ఈ జెట్లకు శక్తినిచ్చే 113 ఇంజిన్ల కోసం అమెరికా GE కంపెనీతో వేరుగా ఒప్పందం కుదుర్చుకున్నారు. మొత్తం మీద ఈ డీల్ వాయుసేన భవిష్యత్తు రూపురేఖలను మార్చే నిర్ణయంగా భావిస్తున్నారు.