న్యూస్ డెస్క్: 800 కోట్లకు పైగా జనాభా ఉన్న ఈ ప్రపంచంలో, కేవలం కొద్దిమంది వ్యక్తులు తీసుకునే నిర్ణయాలు ప్రపంచ గతిని, స్థితిని మారుస్తాయి. మనకు నచ్చినా నచ్చకపోయినా, ఈ వ్యక్తులే ప్రపంచ ఆర్థిక వ్యవస్థలను, సరిహద్దులను మార్చగలుగుతూ వందల కోట్ల మంది జీవితాలను ప్రభావితం చేస్తారు. ఈ జాబితాలో జిన్ పింగ్ (చైనా అధ్యక్షుడు), అమెరికా అధ్యక్షుడు డొనాల్డ్ ట్రంప్ ప్రథమ స్థానాల్లో ఉన్నారు.
ఈ శక్తివంతమైన వ్యక్తుల జాబితాలో భారతదేశ ప్రధానమంత్రి నరేంద్ర మోడీ నాలుగో స్థానంలో ఉన్నారు. ప్రపంచంలోనే అత్యధిక జనాభా కలిగిన ప్రజాస్వామ్య దేశమైన భారతదేశ విధానాన్ని ఆయన నియంత్రిస్తారు. వేగంగా అభివృద్ధి చెందుతున్న ఆర్థిక, సైనిక సూపర్ పవర్ విషయంలో ఆయన విధానాలు దక్షిణాసియా, మధ్యప్రాచ్యంలో ప్రతిదానిపైనా ప్రభావం చూపుతాయి.
ప్రపంచ ఆర్థిక వ్యవస్థపై ఎక్కువ ఆధిపత్యాన్ని కలిగి ఉన్న ఫెడరల్ రిజర్వ్ చైర్మన్ జెరోమ్ పావెల్ ఈ జాబితాలో ఐదో స్థానంలో ఉన్నారు. వడ్డీ రేట్లను నిర్ణయించడం ద్వారా, అతను ద్రవ్యోల్బణం, ఉపాధి, కరెన్సీల విలువను ప్రభావితం చేస్తారు. రష్యా అధ్యక్షుడు వ్లాదిమిర్ పుతిన్ కూడా అణ్వాయుధ దేశానికి నాయకత్వం వహిస్తూ, తన నిర్ణయాలతో ప్రాంతాలను అస్థిరపరచగల శక్తి కలిగి ఉన్నారు.
టెక్ దిగ్గజాలు, వ్యాపారవేత్తలు కూడా ఈ జాబితాలో కీలక స్థానాల్లో ఉన్నారు. ప్రపంచ కుబేరుడు ఎలాన్ మస్క్ (టెస్లా, స్పేస్ఎక్స్) మూడో స్థానంలో ఉండగా, టెక్ దిగ్గజం యాపిల్ సీఈవో టిమ్ కుక్ కూడా తన ప్రభావం చూపిస్తున్నారు. మైక్రోసాఫ్ట్ సహ వ్యవస్థాపకుడు, పరోపకారి బిల్ గేట్స్ తన ఫౌండేషన్ ద్వారా ప్రపంచ సవాళ్లను పరిష్కరించడానికి నిధులు సమకూరుస్తూ పదిలో ఒకరిగా నిలిచారు.
శక్తి, ప్రభావం, నియంత్రణ అనే ఈ మూడింటినీ కలిగి ఉన్న వ్యక్తులే పవర్ ఫుల్ శక్తులుగా మారతారు. ఈ జాబితాలో సౌదీ అరేబియా యువరాజు మహ్మద్ బిన్ సల్మాన్ (చమురు ఎగుమతిదారు) ఎనిమిదో స్థానంలో, యూరోపియన్ కమిషన్ అధ్యక్షురాలు ఉర్సులా వాన్ డెర్ లేయన్ తొమ్మిదో స్థానంలో ఉన్నారు. వీరు ప్రపంచవ్యాప్తంగా నిర్ణయాలు ఎలా మారుతాయో అర్థం చేసుకోవాలంటే వారి స్థానాన్ని పరిశీలించాలి.