కేరళ రాష్ట్రానికి చెందిన వాయనాడ్ రోబస్టా కాఫీకి కేంద్ర ప్రభుత్వ “ఒక జిల్లా – ఒక ఉత్పత్తి” (ODOP) కార్యక్రమంలో గుర్తింపు లభించింది. వ్యవసాయ విభాగంలో ఈ గౌరవం దక్కడం వలన వాయనాడ్ కాఫీ దేశవ్యాప్తంగా ప్రత్యేక స్థానాన్ని సంపాదించింది.
వాయనాడ్ ఎంపీ ప్రియాంకా గాంధీ ఈ విజయం పట్ల హర్షం వ్యక్తం చేస్తూ, ఇది స్థానిక రైతుల కృషికి గర్వకారణమని తెలిపారు. జిఐ ట్యాగ్ కలిగిన ఈ కాఫీ నెదర్లాండ్స్ వంటి దేశాలకు ఎగుమతి అయ్యి, 86-88 కప్ స్కోర్లతో స్పెషాలిటీగా గుర్తింపు పొందింది.
వాయనాడ్ కాఫీ విజయానికి భౌగోళిక స్వరూపం, సంప్రదాయ సాగు విధానాలు తోడ్పడ్డాయి. కేరళ ప్రభుత్వ “క్లైమేట్ స్మార్ట్ కాఫీ ప్రాజెక్ట్” కూడా ఈ ప్రోత్సాహానికి తోడై, రైతులకు శిక్షణ, మార్కెటింగ్ దిశగా మార్గదర్శకంగా నిలుస్తోంది.
ఈ ప్రాజెక్ట్ ద్వారా 80 శాతం చిన్న రైతులు లబ్ధిపొందుతున్నారు. ‘వాయనాడ్ కాఫీ పార్క్’ ద్వారా గిరిజనులు, మహిళలకు స్వావలంబనకు దారి తెరుస్తోంది. ఇది పర్యావరణ పరిరక్షణకూ దోహదం చేస్తోంది.
గ్లోబల్ మార్కెట్‌‍లో ‘వాయనాడ్ రోబస్టా’ స్థానం సంపాదించడంలో ఈ గుర్తింపు కీలక మైలురాయిగా నిలుస్తోంది. రైతుల జీవితాల్లో మార్పుకు ఇది మార్గం వేస్తోంది.