న్యూస్ డెస్క్: ఆసియా కప్ 2025 కోసం టీమిండియా జట్టులో కీలక మార్పులు చోటుచేసుకున్నాయి. ముఖ్యంగా స్టార్ ఆల్‌రౌండర్ హార్దిక్ పాండ్యాను వైస్ కెప్టెన్ బాధ్యతల నుంచి తొలగించడం అందరినీ ఆశ్చర్యానికి గురి చేసింది. ఆయన స్థానంలో యువ ఓపెనర్ శుభ్‌మన్ గిల్‌ను కెప్టెన్ సూర్యకుమార్ యాదవ్‌కు డిప్యూటీగా నియమించడం పెద్ద చర్చకు దారితీసింది.
మాజీ క్రికెటర్ మదన్ లాల్ ఈ నిర్ణయంపై స్పందిస్తూ, హార్దిక్‌ను ఎందుకు తప్పించారో అర్థం కావడం లేదని చెప్పారు. అయితే గిల్ ఎంపిక సరైనదే అని అభిప్రాయపడ్డారు. గిల్ ప్రస్తుతం అద్భుత ఫామ్‌లో ఉన్నాడని, భవిష్యత్తులో మూడు ఫార్మాట్లలోనూ కీలక ఆటగాడిగా ఎదుగుతాడని ఆయన పేర్కొన్నారు.
ఇక మాజీ ఆటగాడు మహమ్మద్ కైఫ్ వేరే కోణంలో విశ్లేషించాడు. గిల్ వైస్ కెప్టెన్ కావడం మంచి పరిణామమే అయినా, ఇది సంజూ శాంసన్ వంటి ఆటగాళ్లకు అవకాశాలను కష్టతరం చేస్తుందని ఆయన అభిప్రాయపడ్డాడు. గిల్ టాప్ ఆర్డర్‌లో ఆడటం వల్ల పోటీ మరింత పెరుగుతుందని అన్నారు.
కైఫ్ తన అంచనాలను వెల్లడిస్తూ, గిల్ అభిషేక్ శర్మతో కలిసి ఓపెనింగ్ చేస్తాడని, తిలక్ వర్మ మూడో స్థానంలో, కెప్టెన్ సూర్యకుమార్ నాలుగో స్థానంలో ఉంటారని వివరించాడు. ఈ క్రమంలో సంజూ శాంసన్‌కు తుది జట్టులో స్థానం సులభం కాదని స్పష్టం చేశాడు.
మొత్తం మీద హార్దిక్ నుంచి బాధ్యతలు తీసేసి గిల్‌కు ఇచ్చిన ఈ నిర్ణయం క్రికెట్ వర్గాల్లో చర్చనీయాంశమైంది. ఈ మార్పు టీమిండియాకు ఎంతవరకు ఉపయోగపడుతుందో రాబోయే మ్యాచ్‌లలో తేలనుంది.