న్యూస్ డెస్క్: బంగారం ధరలు ఆకాశాన్ని అంటుతున్న ఈ రోజుల్లో, తగ్గుతాయనే వార్తలు సామాన్యులకు శుభవార్తగా మారాయి. ఇటీవల 22 క్యారెట్ల బంగారం లక్ష రూపాయలు దాటగా, 24 క్యారెట్లు రూ.1.10 లక్షల వద్దకు చేరుకుంది. కానీ త్వరలోనే ధరలు 25-30 వేల వరకు పడిపోవచ్చని నిపుణులు చెబుతున్నారు.
ఈ తగ్గింపుకు ప్రధాన కారణాలు అంతర్జాతీయ మార్కెట్ పరిణామాలే. అమెరికా వడ్డీ రేట్లు పెంచితే డాలర్ బలపడుతుంది. దాంతో ఇన్వెస్టర్లు బంగారంలోనుంచి డబ్బులు తీసి డాలర్ వైపు మళ్లిస్తారు. ఫలితంగా బంగారం ధరలు తగ్గే అవకాశం ఉంది.
రష్యా-ఉక్రెయిన్ యుద్ధం, ఇరాన్-ఇజ్రాయిల్ ఉద్రిక్తతలు తగ్గితే కూడా మార్కెట్లలో భయాందోళనలు తగ్గిపోతాయి. ఇన్వెస్టర్లు స్టాక్ మార్కెట్ వైపు మొగ్గు చూపుతారు. దీంతో బంగారం డిమాండ్ తగ్గుతుంది.
అలాగే చైనా భారీగా బంగారం నిల్వలు పెంచుతోంది. ఒకవేళ అది తగ్గిస్తే, ధరలు మరింత పడిపోవచ్చు. అదనంగా రూపాయి విలువ నిలబడితే కూడా బంగారం ధరలు క్రమంగా తగ్గుతాయి.
ప్రస్తుతం అంతర్జాతీయ మార్కెట్లో ఒక ఔన్స్‌ బంగారం ధర 3600 డాలర్ల వద్ద ఉంది. ఇది 3200 డాలర్లకు పడిపోతే, భారత మార్కెట్లో 10 గ్రాముల ధర రూ.85 వేలకు చేరే అవకాశం ఉంది.
మొత్తం మీద, గ్లోబల్ మార్కెట్ పరిణామాలు, ప్రభుత్వ విధానాలపై ఆధారపడి బంగారం ధరలు త్వరలో తగ్గే సూచనలు కనిపిస్తున్నాయి.