జూబ్లీహిల్స్: ఉప ఎన్నికను తెలంగాణ బీజేపీ తీవ్రమైన సవాలుగా తీసుకుంటోంది. ఈ విషయాన్ని రాష్ట్ర బీజేపీ అధ్యక్షుడు రామచందర్ రావు మీడియా సమావేశంలో వెల్లడించారు. బలమైన ప్రతిపక్షం ఉంటే అధికార పార్టీకి గెలుపు అంత సులభం కాదని వ్యాఖ్యానించారు.
సోమవారం ఆయన మాట్లాడుతూ, రానున్న 25 రోజుల్లో రాష్ట్రానికి కొత్త కమిటీని ప్రకటిస్తామని తెలిపారు. అన్ని సామాజిక వర్గాలను ప్రతిబింబించేలా ఈ కమిటీ ఉంటుంది అని చెప్పారు.
పార్టీలో వర్గాల సమస్యలేదని, అందరూ ఐక్యంగా పని చేస్తున్నారని రామచందర్ రావు స్పష్టం చేశారు. ముఖ్య నేతలతో చర్చించి సమతుల్య కమిటీ ఏర్పాటవుతుందన్నారు.
గతంలో స్థానిక సంస్థల ఎన్నికలను తక్కువగా తీసుకున్నప్పటికీ, ఈసారి వాటిపై పూర్తి దృష్టి సారిస్తామని చెప్పారు. పార్టీని గ్రామస్థాయి నుంచి బలోపేతం చేయడమే లక్ష్యమన్నారు.
బీజేపీ ఇప్పుడు ప్రతి ఉప ఎన్నికను అవకాశంగా భావిస్తోందని, జూబ్లీహిల్స్ ఉప ఎన్నికలో కూడా జాతీయ స్థాయిలో ప్రభావం చూపే ప్రయత్నం చేస్తుందని స్పష్టంగా పేర్కొన్నారు.