న్యూస్ డెస్క్: ప్రపంచ రాజకీయ చరిత్రలో అధికారం ఎంత శక్తివంతమైనదో, అంత ప్రమాదకరమైనది కూడా. దేశాలను నడిపిన నాయకులే తిరుగుబాట్లు, రాజకీయ ప్రత్యర్థిత్వం, అధికార దుర్వినియోగం వంటి కారణాలతో మరణదండనను ఎదుర్కొన్న సందర్భాలు కోకొల్లలు. తాజాగా, బంగ్లాదేశ్ మాజీ ప్రధాని షేక్ హసీనాకు ఉరిశిక్ష విధిస్తూ కోర్టు తీర్పు ఇవ్వడం, ఈ చారిత్రక విషాదాలను మరోసారి గుర్తుచేస్తోంది.
ఈ జాబితాలో సంచలనం సృష్టించిన కేసు పాకిస్థాన్ మాజీ అధ్యక్షుడు జుల్ఫికర్ అలీ భుట్టోది. పీపుల్స్ పార్టీ వ్యవస్థాపకుడైన ఆయనను, ఓ రాజకీయ హత్య కేసులో దోషిగా తేల్చి 1979లో రావల్పిండి జైలులో ఉరితీశారు. ఈ ఘటన పాక్ రాజకీయాల్లో ఇప్పటికీ వివాదాస్పదమే.
తుర్కియేలో ప్రజాస్వామ్యబద్ధంగా ఎన్నికైన తొలి ప్రధానులలో ఒకరైన అద్నాన్ మెండెరస్ను, 1960లో జరిగిన సైనిక తిరుగుబాటు తర్వాత విచారించి మరణశిక్ష అమలు చేశారు. ఆయనతో పాటు మరో ఇద్దరు మంత్రులను కూడా ఉరితీయడం అప్పట్లో సంచలనం రేపింది.
ఇరాక్ మాజీ అధ్యక్షుడు సద్దాం హుసేన్ మరణం మరో హైప్రొఫైల్ శిక్ష. 1982లో 148 మంది షియా ముస్లింల హత్యకు బాధ్యుడిగా తేలుస్తూ, ఇరాక్ ప్రత్యేక కోర్టు ఆయనకు మరణశిక్ష విధించింది. 2006 డిసెంబర్లో ఆయనను ఉరితీశారు. ఇది మధ్యప్రాచ్య రాజకీయాలను కుదిపేసింది.
దక్షిణ కొరియాలో సైనిక తిరుగుబాటు ద్వారా అధికారంలోకి వచ్చిన చున్ డూ హ్వాన్కు, ప్రజాస్వామ్య ఉద్యమాన్ని అణచివేసినందుకు కోర్టు మరణశిక్ష విధించింది. అయితే, తర్వాత ఆ శిక్షను యావజ్జీవ కారాగార శిక్షగా మార్చారు.
పాకిస్థాన్కే చెందిన మరో సైనిక నియంత పర్వేజ్ ముషారఫ్కు కూడా రాజ్యాంగాన్ని ఉల్లంఘించినందుకు ప్రత్యేక కోర్టు మరణదండన విధించింది. ఆ తీర్పును తర్వాత హైకోర్టు రద్దు చేసినా, అది పాక్ చరిత్రలో ఓ సంచలన ఘట్టంగా నిలిచిపోయింది.
ఈ ఉదంతాలన్నీ అధికారం తప్పుదారి పట్టినప్పుడు, రాజకీయ సంక్షోభాలు తలెత్తినప్పుడు దేశాధినేతలు సైతం ఎంతటి తీవ్ర పరిణామాలను ఎదుర్కోవాల్సి వస్తుందో చరిత్రకు సాక్ష్యాలుగా నిలుస్తున్నాయి.