న్యూస్ డెస్క్: తీన్మార్ మల్లన్న అలియాస్ చింతపండు నవీన్ కుమార్ తన రాజకీయ ప్రయాణంలో కీలక అడుగు వేశారు. అధికారికంగా తన కొత్త పార్టీని ప్రకటించారు. పార్టీకి తెలంగాణ రాజ్యాధికార పార్టీ అనే పేరు ఖరారు చేశారు.
హైదరాబాద్ బంజారాహిల్స్లోని తాజ్ కృష్ణా హోటల్లో జరిగిన కార్యక్రమంలో పార్టీ పేరు, జెండాను ఆవిష్కరించారు. ఈ వేడుకకు ఆయన అనుచరులు, మద్దతుదారులు పెద్ద ఎత్తున హాజరయ్యారు.
పార్టీ జెండా ప్రత్యేకంగా రూపొందించబడింది. పైభాగంలో ఎరుపు, కింద భాగంలో ఆకుపచ్చ రంగులు ఉన్నాయి. మధ్యలో కార్మిక చక్రం, దాని నుంచి పైకి లేస్తున్నట్లుగా పిడికిలి బిగించిన మానవ చేతి చిహ్నం ఉంది.
జెండా ఇరువైపులా రెండు ఆలీవ్ ఆకులు ఉంచారు. శాంతి, సంక్షేమానికి ఇవి ప్రతీకలుగా నిలుస్తాయని మల్లన్న తెలిపారు.
జెండాపై ఆత్మగౌరవం, అధికారం, వాటా అనే నినాదం ముద్రించారు. ఈ నినాదం ద్వారా తెలంగాణ ప్రజలకు తమ హక్కులు అందించే పోరాటం చేస్తామని స్పష్టం చేశారు.
మల్లన్న మాట్లాడుతూ, “ప్రజలే మా శక్తి. వారి కోసం నిజమైన స్వరంగా నిలబడతాం” అని అన్నారు. ఆయన కొత్త పార్టీ తెలంగాణ రాజకీయాల్లో ఏ మార్పులు తేవనుందో చూడాలి.