‘అఖండ 2‘ విడుదల వాయిదా పడటం ఇప్పుడు టాలీవుడ్లో హాట్ టాపిక్గా మారింది. ఆర్థిక వివాదాల కారణంగా చివరి నిమిషంలో సినిమా ఆగిపోవడం అందరినీ కలచివేసింది. ఈ విషయంపై సీనియర్ నిర్మాత సురేష్ బాబు స్పందించారు.
నందు హీరోగా నటించిన ‘సైక్ సిద్ధార్థ’ సినిమా ట్రైలర్ లాంచ్ ఈవెంట్లో పాల్గొన్న ఆయన, ‘అఖండ 2’ ఇష్యూ గురించి మీడియా అడిగిన ప్రశ్నలకు చాలా బ్యాలెన్స్డ్గా సమాధానం ఇచ్చారు.
సురేష్ బాబు మాట్లాడుతూ.. “ఇది అనుకోకుండా వచ్చిన డిస్ప్యూట్. ఎవరూ ఇలా జరగాలని కోరుకోరు” అని అన్నారు. సమస్య పరిష్కారానికి తాను కూడా ప్రయత్నించానని ఆయన పరోక్షంగా హింట్ ఇచ్చారు.
ఆర్థిక లావాదేవీల గురించి చర్చిస్తూ.. “ఇవి బిజినెస్ మేటర్స్. వీటిని పబ్లిక్లో డిస్కస్ చేయడం కరెక్ట్ కాదు” అని సురేష్ బాబు అభిప్రాయపడ్డారు. “దురదృష్టవశాత్తు ఇప్పుడు బిజినెస్ పార్ట్ ఎక్కువగా బయటకు వచ్చేస్తోంది” అని అన్నారు.
గతంలో కూడా ఇలాంటి సమస్యలు ఉన్నాయని, కానీ అప్పుడు ఇంతలా బయటకు రాలేదని ఆయన గుర్తుచేశారు. నిర్మాతలు ముందుగానే ప్లాన్ చేసుకుంటే ఇలాంటివి సాల్వ్ అవుతాయని ఆయన సూచించారు.
సినిమా ఆలస్యం అవ్వడం బాధాకరమే అయినా, త్వరలోనే అన్నీ సర్దుకుంటాయని, ప్రేక్షకులు మంచి సినిమాను చూసే అవకాశం వస్తుందని సురేష్ బాబు ఆశాభావం వ్యక్తం చేశారు. ఆర్థిక విషయాలు రచ్చకెక్కడం కంటే, అంతర్గతంగా పరిష్కరించుకోవడం మంచిదని ఆయన సూచించారు.