‘పుష్ప’, ‘యానిమల్’ వంటి భారీ మాస్ బ్లాక్బస్టర్ల తర్వాత, నేషనల్ క్రష్ రష్మిక మందన్న చేసిన ప్రయోగం ఫలించింది. ఆమె ప్రధాన పాత్రలో నటించిన ఎమోషనల్ డ్రామా ‘ది గర్ల్ఫ్రెండ్’ 5 రోజుల్లో ప్రపంచవ్యాప్తంగా రూ. 20.4 కోట్ల గ్రాస్ను వసూలు చేసింది.
స్టార్ హీరో లేకుండా, కేవలం కంటెంట్ను నమ్మి రష్మిక చేసిన ఈ ఫీమేల్ సెంట్రిక్ సినిమాకు ఇది సాలిడ్ నంబర్. మొదట్లో స్లో స్టార్ట్ అందుకున్నా, ఆ తర్వాత పుంజుకున్న తీరు ఆకట్టుకుంది.
ఈ సినిమా విజయానికి అసలు సిసలు నిదర్శనం “మండే టెస్ట్”. చాలా సినిమాలు సోమవారం డల్ అవుతాయి, కానీ ‘ది గర్ల్ఫ్రెండ్’ తొలిరోజు కంటే సోమవారం ఎక్కువ వసూళ్లు రాబట్టింది. ఇది సినిమాకు బలమైన పాజిటివ్ మౌత్ టాక్ ఉందని నిరూపించింది.
“తెలుగు ఫిలిం ఇండస్ట్రీ ఫెయిల్ అవ్వలేదు” అంటూ మేకర్స్ వదిలిన పోస్టర్ను ప్రేక్షకులు నిజం చేశారు. రష్మిక నమ్మకాన్ని ఆదరించి, మంచి కంటెంట్కు పట్టం కట్టారు.
ఈ 20 కోట్లు స్టార్ హీరో సినిమా రేంజ్ కాకపోయినా, ఈ జానర్కు ఇది చాలా రెస్పెక్టబుల్ ఫిగర్. ముఖ్యంగా, ఓవర్సీస్లో హాఫ్ మిలియన్ డాలర్ ($500K+) మార్క్ను దాటడం సినిమాకు పెద్ద బూస్ట్ ఇచ్చింది.
ప్రస్తుతం బాక్సాఫీస్ వద్ద సక్సెస్ఫుల్గా రన్ అవుతున్న ‘ది గర్ల్ఫ్రెండ్’, రెండో వారాంతంలో మరింత పుంజుకునే అవకాశం ఉంది.