గ్లోబల్ స్టార్ రామ్ చరణ్, ఉపాసన కొణిదెల ఇంట ఆనందం రెట్టింపు కానుంది. ఈ దీపావళి తమకు “డబుల్ సెలబ్రేషన్” అంటూ ఉపాసన సోషల్ మీడియాలో ఓ హింట్ ఇవ్వగా, ఆ “డబుల్” వెనుక ఉన్న అసలు రహస్యం ఇప్పుడు అధికారికంగా బయటపడింది.
ఈ స్టార్ కపుల్ త్వరలో కవలలకు (ట్విన్స్) జన్మనివ్వబోతున్నారు. ఈ శుభవార్తను ఓ అందమైన బేబీ షవర్ (సీమంతం) వేడుక వీడియో ద్వారా అభిమానులతో పంచుకున్నారు. ఈ వేడుక అత్యంత సన్నిహితులు, కుటుంబ సభ్యుల మధ్య ఘనంగా జరిగింది.
ఈ వేడుకకు మెగాస్టార్ చిరంజీవి, కింగ్ నాగార్జున, వరుణ్ తేజ్ వంటి కుటుంబ సభ్యులు, ఆప్తులు హాజరై కాబోయే తల్లిదండ్రులను మనసారా ఆశీర్వదించారు. సంప్రదాయం, ఆధునికత కలగలిసి ఈ వేడుక ఎంతో హుందాగా సాగింది.
రామ్ చరణ్, ఉపాసన దంపతులకు ఇప్పటికే ‘క్లీంకార కొణిదెల’ అనే ముద్దుల కుమార్తె ఉన్న సంగతి తెలిసిందే. క్లీంకార రాకతో తమ జీవితం పరిపూర్ణమైందని భావించిన ఈ జంటకు, ఇప్పుడు ఆ ఆనందం రెట్టింపు కాబోతోంది.
క్లీంకారకు తోడుగా మరో ఇద్దరు చిన్నారులు రాబోతుండటంతో మెగా ఫ్యామిలీలో సంబరాలు అంబరాన్నంటాయి. చరణ్, ఉపాసన తమ కవలల రాక కోసం ఎంతో ఆత్రుతగా ఎదురుచూస్తున్నారు. ఈ వార్తతో మెగా అభిమానులు ఆనందంలో మునిగిపోయారు.