న్యూస్ డెస్క్: భారత్, పాకిస్థాన్ క్రికెట్ జట్ల మధ్య మనస్పర్థలు మరోసారి చర్చనీయాంశంగా మారాయి. వరల్డ్ ఛాంపియన్షిప్ ఆఫ్ లెజెండ్స్ 2025లో ఇండియా లెజెండ్స్ జట్టు, పాక్ జట్టుతో ఆడేందుకు నిరాకరించడమే దీనికి కారణం. ఈ వ్యవహారాన్ని తీవ్రంగా తీసుకున్న పాకిస్థాన్ క్రికెట్ బోర్డు (పీసీబీ) కీలక నిర్ణయం తీసుకుంది.
ఆగస్టు 1న పీసీబీ చైర్మన్ మోహ్సిన్ నఖ్వీ అత్యవసర సమావేశం నిర్వహించారు. ఇందులో, అనధికారిక టోర్నీల్లో ‘పాకిస్థాన్’ అనే పేరును వాడటం వల్ల బోర్డు ప్రతిష్ఠకు నష్టం జరుగుతోందని అభిప్రాయపడ్డారు. ఇకపై ఇలాంటివి మానుకోవాలని తేల్చారు.
ఈ మేరకు, ఎవరైనా ప్రైవేట్ టోర్నీ నిర్వహించాలంటే, లేదా ఏ జట్టు అయినా ‘పాకిస్థాన్’ పేరు ఉపయోగించాలంటే పీసీబీ అనుమతి తప్పనిసరిగా ఉండాలని స్పష్టం చేశారు. ఈ నిబంధనను ఉల్లంఘిస్తే కఠిన చర్యలు తప్పవని హెచ్చరించారు.
ఈ వివాదంతో, రెండు దేశాల క్రికెట్ సంబంధాలు మరింత ఉద్రిక్తతల్లోకి వెళ్లే అవకాశం ఉంది. ఇప్పటికే రాజకీయంగా మారిన క్రికెట్ వాతావరణం, మరోసారి లెజెండ్స్ టోర్నీ కారణంగా వేడెక్కుతోంది.
ఈ నిర్ణయం భవిష్యత్తులో జరగబోయే ఎగ్జిబిషన్ మ్యాచులపై తీవ్ర ప్రభావం చూపుతుందని విశ్లేషకులు అంచనా వేస్తున్నారు.