ఆంధ్రప్రదేశ్: ప్రభుత్వ కార్యాలయాల్లో ఉప ముఖ్యమంత్రి పవన్ కళ్యాణ్ ఫోటోలు ఉంచడంపై దాఖలైన ప్రజా ప్రయోజన వాజ్యం హైకోర్టులో విచారణకు వచ్చింది. ఈ సందర్భంగా కోర్టు చేసిన వ్యాఖ్యలు ఇప్పుడు చర్చనీయాంశమయ్యాయి.
విజయవాడకు చెందిన ఒక రిటైర్డ్ రైల్వే ఉద్యోగి ఈ పిల్ దాఖలు చేశారు. ఆయన వాదన ప్రకారం రాజ్యాంగంలో “ఉప ముఖ్యమంత్రి” అనే పదవి ప్రత్యేకంగా లేదని, కాబట్టి ముఖ్యమంత్రి ఫోటోతో సమానంగా పవన్ ఫోటో ఉంచడం నిబంధనలకు విరుద్ధమని అభ్యంతరం వ్యక్తం చేశారు.
అయితే, హైకోర్టు ఈ వాదనను పూర్తిగా తోసిపుచ్చింది. “ఉప ముఖ్యమంత్రి ఫోటో పెట్టకూడదని ఎక్కడైనా నిషేధం ఉందా?” అని కోర్టు సూటిగా ప్రశ్నించింది. పవన్ కూడా రాజ్యాంగబద్ధమైన మంత్రి హోదాలో ఉన్నారని, కాబట్టి ఆయన ఫోటోలు ఉంచడంలో తప్పు లేదని స్పష్టం చేసింది.
ఈ సందర్భంగా కోర్టు, ప్రజలకు ఉపయోగకరమైన పిటిషన్లు దాఖలు చేయాలని సూచించింది. రాజకీయ ప్రయోజనాల కోసం ఇలాంటి కేసులు వేయడం తగదని హెచ్చరించింది. ఫలితంగా ఈ పిల్ను కొట్టి వేసింది.
మొత్తం మీద, పవన్ కళ్యాణ్ ఫోటోలు ప్రభుత్వ కార్యాలయాల్లో ఉంచడంలో ఎలాంటి ఇబ్బంది లేదని హైకోర్టు తేల్చేసింది. దీంతో అభిమానులు సంతోషం వ్యక్తం చేస్తున్నారు. ఈ తీర్పుతో అనేక ఊహాగానాలకు తెరపడింది.