2025లో వెండితెరపై మెగాస్టార్ చిరంజీవి సందడి మిస్సయిన అభిమానులకు 2026 డబుల్, ట్రిపుల్ ట్రీట్ ఇవ్వనుంది. రీ-ఎంట్రీ తర్వాత కాస్త అటు ఇటుగా సాగుతున్న చిరు కెరీర్, వచ్చే ఏడాది మాత్రం మూడు విభిన్నమైన చిత్రాలతో ఫుల్ స్వింగ్లోకి రానుంది. వరుసగా మూడు పండుగలకు మూడు సినిమాలతో బాక్సాఫీస్ను షేక్ చేయడానికి మెగాస్టార్ సిద్ధమవుతున్నారు.
ఈ మెగా హ్యాట్రిక్ వేడుక సంక్రాంతితో ప్రారంభం కానుంది. ఫ్లాప్ ఎరుగని దర్శకుడు అనిల్ రావిపూడి దర్శకత్వంలో తెరకెక్కుతున్న ‘మన శంకర వరప్రసాద్ గారు’ చిత్రం పండగ బరిలో నిలవనుంది. పూర్తిస్థాయి ఫ్యామిలీ ఎంటర్టైనర్గా రూపుదిద్దుకుంటున్న ఈ సినిమాపై ఇప్పటికే భారీ అంచనాలున్నాయి. సంక్రాంతికి ఫ్యామిలీ ఆడియన్స్ను అలరించడంలో అనిల్ రావిపూడికి తిరుగులేదు, దానికి చిరు తోడవ్వడంతో హిట్ ఖాయమనే ధీమా వ్యక్తమవుతోంది.
సంక్రాంతి సందడి ముగియగానే, వేసవి సెలవుల్లో ‘విశ్వంభర’తో మరో అద్భుతానికి చిరంజీవి తెరలేపనున్నారు. ‘బింబిసార’తో సంచలనం సృష్టించిన మల్లిడి వశిష్ట దర్శకత్వంలో వస్తున్న ఈ సోషియో-ఫాంటసీ చిత్రం షూటింగ్ ఇప్పటికే పూర్తయింది. గ్రాఫిక్స్, ప్యాచ్ వర్క్ పనుల కారణంగా కాస్త ఆలస్యమైనా, 2026 సమ్మర్కు గ్రాండ్ రిలీజ్కు సిద్ధమవుతోంది. విభిన్నమైన కథాంశంతో వస్తున్న ఈ సినిమాపై అంచనాలు తారాస్థాయిలో ఉన్నాయి.
ఇక 2026 ద్వితీయార్థంలో, దసరా లేదా దీపావళికి, మరో మాస్ జాతర ఖాయంగా కనిపిస్తోంది. ‘వాల్తేరు వీరయ్య’తో బ్లాక్బస్టర్ ఇచ్చిన దర్శకుడు బాబీ కొల్లితో చిరంజీవి మరోసారి జతకట్టారు. ఈ మాస్ యాక్షన్ ఎంటర్టైనర్ను శరవేగంగా పూర్తి చేసి, పండగ సీజన్లో విడుదల చేయాలని ప్లాన్ చేస్తున్నారు. వీరి కాంబోలో వచ్చిన గత చిత్రం సృష్టించిన రికార్డుల దృష్ట్యా, ఈ సినిమాపై కూడా భారీ అంచనాలు నెలకొన్నాయి.
మొత్తం మీద, 2025లో గ్యాప్ తీసుకున్న మెగాస్టార్, 2026లో మాత్రం మూడు చిత్రాలతో అభిమానులకు ట్రిపుల్ ధమాకా ఇవ్వనున్నారు. ఈ మూడు సినిమాలే కాకుండా, ‘దసరా’ ఫేమ్ శ్రీకాంత్ ఓదెలతో కూడా చిరంజీవి ఓ ప్రాజెక్ట్ చేయనుండటం విశేషం. ఆ సినిమా కూడా 2026లోనే సెట్స్పైకి వెళ్లే అవకాశం ఉంది. కాబట్టి, మెగా ఫ్యాన్స్కు వచ్చే ఏడాది పండగే పండగ!