న్యూస్ డెస్క్: డిజిటల్ యుగంలో క్రెడిట్ కార్డులు మన రోజువారీ జీవితంలో భాగమయ్యాయి. కానీ ఒక వ్యక్తి వద్ద 1638 క్రెడిట్ కార్డులు ఉండటం ఆశ్చర్యానికి గురిచేస్తోంది. మణీష్ ధామేజా అనే వ్యక్తి ఈ రికార్డ్ సృష్టించాడు.
అతడు పాత నోట్ల రద్దు సమయం నుంచి ఇప్పటి వరకు వేర్వేరు బ్యాంకుల నుంచి కార్డులు తీసుకొని లావాదేవీలు నిర్వహిస్తున్నాడట.
ఈ వ్యవహారంతో బ్యాంకింగ్ సిస్టమ్ లో భద్రతా లోపాలు బహిర్గతమయ్యాయి. కేవైసీ వెరిఫికేషన్, క్రెడిట్ హిస్టరీ, సిబిల్ స్కోర్ వంటి పద్ధతులు ఉన్నా, ఒకే వ్యక్తికి ఇన్ని కార్డులు ఎలా వచ్చాయన్న ప్రశ్నలు తలెత్తుతున్నాయి.
ఆర్థిక నిపుణుల ప్రకారం, ఇన్ని కార్డులు కలిగి ఉండటం రిస్క్ ఫ్యాక్టర్ పెంచుతుందని, దాంతో సిబిల్ స్కోర్పై ప్రతికూల ప్రభావం పడుతుందని చెబుతున్నారు.
బ్యాంకులు ఎక్కువ సంఖ్యలో కస్టమర్లను ఆకర్షించాలనే ఉద్దేశంతో అజాగ్రత్తగా వ్యవహరిస్తున్నాయని ఆర్థిక వర్గాలు అంటున్నాయి. ప్రతి రోజు క్రెడిట్ కార్డ్ ఆఫర్లతో ఫోన్ కాల్స్, కొత్త స్కీములు వినియోగదారులను ఆకర్షిస్తున్నా, ఆర్థిక నైతికత మరియు నియంత్రణ పద్ధతులు సడలిపోతున్నాయని విమర్శలు వస్తున్నాయి.
మణీష్ ఘటన ఇప్పుడు బ్యాంకులకు ఒక హెచ్చరికగా మారింది. టెక్నాలజీ ఒక సాధనం మాత్రమే.. దాన్ని ఎలా ఉపయోగిస్తామన్నది మన ఆర్థిక బాధ్యత అని నిపుణులు హెచ్చరిస్తున్నారు. డిజిటల్ భద్రత, పారదర్శకత, ఆర్థిక నియంత్రణ ఇవే భవిష్యత్తు ఆర్థిక వ్యవస్థకు రక్షణ కవచాలు కావాలని చెబుతున్నారు.