
న్యూస్ డెస్క్: అక్రమాస్తుల కేసులో వైఎస్సార్ కాంగ్రెస్ పార్టీ అధినేత వైఎస్ జగన్మోహన్రెడ్డికి ఊరట లభించింది. ఇటీవల ఆయన లండన్ పర్యటన సందర్భంగా సెల్ఫోన్ నంబర్ మార్చారంటూ, బెయిల్ షరతులు ఉల్లంఘించారని సీబీఐ దాఖలు చేసిన పిటిషన్ను హైదరాబాద్ సీబీఐ కోర్టు కొట్టివేసింది.
తన కుమార్తెను కలిసేందుకు లండన్ వెళ్లేందుకు జగన్ కోర్టు అనుమతి పొందారు. నిబంధనల ప్రకారం, విదేశాలకు వెళ్లే ముందు ఆయన తన కాంటాక్ట్ నంబర్ను సీబీఐకి అందించాలి. అయితే, ఈసారి జగన్ ఇచ్చిన నంబర్ గతంలో ఇచ్చినదానికి భిన్నంగా ఉందని, పైగా ఆ నంబర్కు కాల్ చేస్తే స్పందన లేదని సీబీఐ ఆరోపించింది.
జగన్ ఉద్దేశపూర్వకంగానే పనిచేయని నంబర్ ఇచ్చారని, ఇది బెయిల్ షరతుల ఉల్లంఘనేనని వాదిస్తూ సీబీఐ కోర్టులో పిటిషన్ వేసింది. దీనిపై విచారణ జరిపిన కోర్టు, జగన్ తరఫు న్యాయవాదుల వాదనలను కూడా పరిగణనలోకి తీసుకుంది.
జగన్ ఎలాంటి ఉద్దేశపూర్వక తప్పు చేయలేదని, పర్యటన ముగించుకుని తిరిగి వచ్చేశారని ఆయన తరఫు న్యాయవాదులు కోర్టుకు తెలిపారు. ఇరుపక్షాల వాదనలు విన్న న్యాయస్థానం, చివరికి సీబీఐ పిటిషన్ను కొట్టివేస్తూ తీర్పునిచ్చింది.
ఈ తీర్పుతో బెయిల్ షరతుల ఉల్లంఘన ఆరోపణల నుంచి జగన్కు తాత్కాలికంగా ఉపశమనం లభించింది. అయితే, ప్రధాన అక్రమాస్తుల కేసు విచారణ యథావిధిగా కొనసాగుతుంది.
