న్యూస్ డెస్క్: అమెరికాలో ఉన్నత చదువులు చదవాలన్న కలను నెరవేర్చుకుంటున్న ఓ భారతీయ విద్యార్థికి ఊహించని కష్టం వచ్చిపడింది. అనుకోకుండా పాస్పోర్ట్ తడవడంతో, దానిపై ఉన్న ఎఫ్-1 వీసా స్టాంప్ అక్షరాలు చెదిరిపోయాయి. ఈ చిన్న పొరపాటు ఇప్పుడు అతని భవిష్యత్తునే గందరగోళంలో పడేసింది. ఈ సమస్య కారణంగా అతను అమెరికాలోనే చిక్కుకుపోయి, ఏం చేయాలో తెలియని అయోమయ స్థితిలో పడ్డాడు.
తన అనుభవాన్ని ‘రెడ్డిట్‘ వేదికగా పంచుకున్న ఈ విద్యార్థి, వీసా పైకి బాగానే కనిపిస్తున్నా, ఎయిర్పోర్ట్ స్కానర్లు దానిని గుర్తించడం లేదని వాపోయాడు. భారత్ నుంచి తిరిగి అమెరికాకు ప్రయాణిస్తున్నప్పుడు ఈ సమస్య బయటపడటంతో, విమానాశ్రయంలో తీవ్ర గందరగోళం నెలకొందని తెలిపాడు.
అయితే, విద్యార్థి అమెరికాలో ఉన్నంత వరకు అతని చట్టపరమైన హోదాకు ఎలాంటి ఢోకా లేదు. ఎందుకంటే ఇమ్మిగ్రేషన్ రికార్డులన్నీ డిజిటల్గా భద్రంగా ఉంటాయి. కానీ, అతను అమెరికా విడిచి వెళ్ళి, తిరిగి ప్రవేశించాలంటే మాత్రం పాస్పోర్ట్పై స్పష్టమైన, చెల్లుబాటయ్యే వీసా స్టాంప్ తప్పనిసరి.
దురదృష్టవశాత్తు, అమెరికాలో ఉండగా వీసాను తిరిగి ముద్రించుకునే (రీ-స్టాంపింగ్) సౌకర్యం లేదు. దీని కోసం అతను తప్పనిసరిగా భారత్కు తిరిగి వెళ్లాల్సిందే. ప్రస్తుతం భారత్లోని అమెరికన్ కాన్సులేట్లలో వీసా అపాయింట్మెంట్ల కోసం నెలల తరబడి నిరీక్షించాల్సి రావడం, ఇంటర్వ్యూ మినహాయింపులు కూడా తాత్కాలికంగా నిలిచిపోవడం అతనికి పెను సవాలుగా మారింది.
మరో రెండు నెలల్లో గ్రాడ్యుయేషన్ పూర్తి చేసుకుని, కెరీర్కు కీలకమైన ఆప్షనల్ ప్రాక్టికల్ ట్రైనింగ్ (OPT) దశకు మారాల్సిన తరుణంలో ఈ సమస్య తలెత్తింది. ఇలాంటి సమయంలో భారత్కు ప్రయాణించడం అతని భవిష్యత్తును ప్రమాదంలో పడేయడమేనని నిపుణులు హెచ్చరిస్తున్నారు.
ప్రస్తుతం ఆ విద్యార్థి తన OPT, ఉద్యోగ అవకాశాలకు ఎలాంటి ఆటంకం కలగకుండా, అత్యంత సురక్షితమైన సమయం చూసుకుని భారత్కు వెళ్లేందుకు ప్రణాళికలు వేసుకుంటున్నాడు. ఈ ఘటన, విదేశాల్లో విద్యార్థుల జీవితం ఎంత సున్నితంగా ఉంటుందో తెలియజేస్తోంది.